नियमित भेटघाटका क्रममा राष्ट्रपतिसँग आज भएको भेटमा उहाँले सुझाव सङ्कलनमा जनताको अत्यधिक सहभागिता रहेको बताउनुभएको थियो ।

राष्ट्रपतिसमक्ष आफूले प्रस्तुत गरेको विवरणबारे थप जानकारी दिँदै सभाध्यक्ष नेम्वाङले भन्नुभयो, “छिटफुट घटनाबाहेक सुझाव सङ्कलनमा जनताको उत्साहपूर्वक सहभागिता रहेको पाइयो । राजधानीमा समेत ज्ञापनपत्र बुझाउनकोे ओइरो लाग्यो, सर्वोच्च अदालतको पूर्ण बैठकबाट पनि मस्यौदामाथि सुझाव प्राप्त भएको छ ।”

सो अवसरमा राष्ट्रपति डा यादवसमक्ष संविधानसभा सचिवालयमा विद्युतीय माध्यमबाट ३३ हजार बढी सुझाव आएकाले जनताको सहभागिता उल्लेख्य हुनुले दलहरुले गरेको प्रयासलाई अनुमोदन गर्नुका साथै द्रुतमार्गबाट संविधान ल्याउन अनुरोधसमेत गरेको जानकारी सभाध्यक्षले गराउनुभएको थियो ।

सो अवसरमा राष्ट्रपति डा यादवले सुझाव सङ्कलन कार्यमा जनताको उल्लेख्य सहभागिताले संविधान लेखनको कार्यलाई अगाडि बढाउन आधार तयार गरेको भन्दै खुसी व्यक्त गर्नुभएको थियो ।

राष्ट्रपति डा यादवले संविधान निर्माण प्रक्रियामा असहमति व्यक्त गर्ने पक्षले विरोध मात्र गर्नुको सट्टा लोकतान्त्रिक प्रक्रिया अवलम्बन गरेर अगाडि बढेको भए हुन्थ्यो भन्ने भनाइ प्रस्तुत गर्नुभएको सभाध्यक्ष नेम्वाङले जानकारी दिनुभयो ।

राष्ट्रपतिले संविधान निर्माणको प्रक्रियामा असहमति व्यक्त गरिरहेका दललाई विश्वासमा लिएर अगाडि बढ्न तथा उपयुक्त समयसीमाभित्र काम फत्ते गर्नसमेत सभाध्यक्षलाई ध्यानाकर्षण गराउनुभएको थियो ।