शनिबार, असार १८ २०७९
काठमाडौं २३:०७
वासिङटन डिसी 13:22

प्रजातान्त्रिक संविधान बनाउन सुझाव महत्वपूर्ण छ: अध्यक्ष नेम्वाङ

इनेप्लिज २०७२ साउन ७ गते १४:५३ मा प्रकाशित

subash_speker_20140217090933काठमाडौँ, ७ साउन । प्रजातान्त्रिक संविधान जारी गरिनुपर्ने सुझावसहित प्रजातान्त्रिक विचार समाजले आज संविधानसभाका अध्यक्ष सुवास नेम्वाङ्लाई नेपालको संविधानको प्रारम्भिक मस्यौदामाथि सुझाव प्रतिवेदन बुझाएको छ ।

समाजका अध्यक्ष डा केदारनरसिंह केसी नेतृत्वमा गएको टोलीले अध्यक्षलाई उहाँकै कार्यकक्ष सिंहदरबारमा भेटी सुझाव बुझाएको हो ।
सुझाव ग्रहण गर्दै अध्यक्ष नेम्वाङले प्रजातान्त्रिक संविधान बनाउन समाजको सुझाव महत्वपूर्ण हुने र सुझावलाई संवैधानिक राजनीतिक संवाद तथा सहमति समितिमा जानकारी गराउने प्रतिवद्धता जनाउनुभयो ।

सुझावमा २००७ सालदेखि जनताले संविधानसभा मार्फत संविधान बनाउने माग गरेकाले अब बन्ने संविधानको प्रस्तावनामै सो कुरा राखिनुपर्ने तथा संविधान हतारमा भन्दा समय लिएर भएपनि सङ्घीयताको सीमाङ्कन गरिनुपर्ने उल्लेख छ । त्यस्तै मस्यौदामा संविधानको नाम नेपालको संविधान २०७२ राखिएकोमा त्यसलाई संशोधन गरी गणतन्त्र वा लोकतन्त्र नेपालको संविधान राखिनुपर्ने, धर्मनिरपेक्षताको सट्टा धार्मिक स्वतन्त्रता राखिनुपर्नेलगायतका सुझाव छन् ।

यसैबीच नेपाल महिला सङघले पनि संविधानमा समेटिनुपर्ने विभिन्न सुझावसहितको प्रतिवेदन आजै अध्यक्ष नेम्वाङलाई बुझाएको छ । सङघका अध्यक्ष डा डिला सङग्रौलाको नेतृत्वमा गएको टोलीले सो सुझाव बुझाएको हो ।

प्रतिक्रिया