शुक्रबार, असार १७ २०७९
काठमाडौं ०१:३९
वासिङटन डिसी 15:54

एक महिनाभित्र संविधान अवश्य बन्छ: एमाले नेता खनाल

इनेप्लिज २०७२ साउन ५ गते ११:४२ मा प्रकाशित

Rss_Images_1437471989656_GL-Ilam-samman (1)इलाम, ५ साउन । पूर्वप्रधानमन्त्री तथा नेकपा (एमाले) का वरिष्ठ नेता झलनाथ खनालले एक महिनाभित्रमा संविधान जारी गरेरै छाड्ने दाबी गर्नुभएको छ ।

सुझाव सङ्कलनमा देखिएको नागरिकको उत्साहप्रद उपस्थितिले संविधान निर्माणको गतिलाई कसैको आदेशले पनि रोक्न नसक्ने बताउँदै उहाँले संविधान जारी हुनेमा ढुक्क हुन आग्रह गर्नुभयो ।

अनेरास्ववियु जिल्ला कमिटी इलामले आज इलाममा आयोजना गरेको एसएलसी परीक्षामा उत्कृष्ट हुने विद्यार्थी र विद्यालयलाई पुरस्कार तथा प्रशंसापत्र प्रदान गर्नुहुँदै नेता खनालले सङ्कलित सुझावलाई संविधानसभामा पुर्‍याएर त्यसको विश्लेषण गरी मस्यौदालाई अन्तिम रुप दिइने बताउनुभयो ।

मस्यौदामा जनताले लोकतान्त्रिक विधि र पद्धतिमार्फत सुझाव दिएको बताउँदै उहाँले “देशको भलो नचाहने एक/दुईवटा शक्तिको तागतले संविधान निर्माण प्रक्रियालाई रोक्न सक्दैन, संविधान एक बन्छ, दुई बन्छ, तीन बन्छ र बनेरै छाड्छ” – भन्नुभयो ।

विगतमा बनेका संविधानले मुलुकलाई स्थायित्व दिन नसकेको टिप्पणी गर्नुहुँदै उहाँले अब दिगो र स्थायी संविधान बन्नेमा ढुक्क रहन आग्रह गर्नुभयो । पहिलो संविधानसभाको निर्वाचनले मुलुकलाई संविधान दिन नसकेकाले दोस्रो चरणको निर्वाचन गर्नुपरेको उहाँले बताउनुभयो । नेपाली काँग्रेस, नेकपा (एमाले), एनेकपा (माओवादी)बीच भएको १६ बुँदे सहमतिपछि मुलुकले नयाँ मोड लिएको उहाँको भनाइ थियो ।

अनेरास्ववियुले प्रवेशिका परीक्षामा उत्कृष्ट नतिजा ल्याउने सामुदायिकतर्फका सूर्यमणि दाहाल र पञ्च उच्च मावि शान्तिडाँडाकी छात्रा एरिना श्रेष्ठ, संस्थागततर्फ माउन्ट मेची बोर्डिङ स्कुलका सन्देश लिम्बू र ग्रीनभ्याली एकेडेमीकी छात्रा दीक्षान्ती तिरुवा विश्वकर्मा तथा प्राविधिक एसएलसीमा सर्वाेत्कृष्ट नतिजा ल्याउने अमर उच्च मावि बरबोटेका केशव पोखरेल तथा विद्यालयलाई पुरस्कारसहित प्रशंसापत्र प्रदान गर्‍यो ।

अनेरास्ववियु जिल्ला कमिटी अध्यक्ष रवीन्द्रप्रसाद सुवेदीको अध्यक्षतामा भएको कार्यक्रममा प्रमुख जिल्ला अधिकारी विष्णुकुमार कार्की, निमित्त जिल्ला शिक्षा अधिकारी डम्बरबहादुर सुवेदी, नेपाल शिक्षक युनियनका जिल्ला अध्यक्ष पूर्णप्रसाद गौतम र स्थानीय विकास अधिकारी मदन कोइरालाले अनेरास्ववियुको काम प्रशंसनीय रहेको चर्चा गर्नुभयो ।

प्रतिक्रिया