झन्डै १७ वर्षदेखि हुन नसकेको स्थानीय निकायको निर्वाचन गर्ने सम्बन्धमा सरकारले अगाडि सारेको योजना सराहनीय भए पनि अन्य कार्यक्रम भने विगतको निरन्तरता भएको उहाँहरुको भनाइ थियो ।

कृषि क्षेत्रको विकास र विस्तार गर्ने प्रभावकारी कार्ययोजना नभएको, पर्यटन तथा जलविद्युत् क्षेत्रमा लगानी बढाउनुपर्ने भए पनि त्यसो हुन नसकेको, गरिब समुदायको हितका लागि कुनै पनि कार्यक्रम नआएकामा सांसदहरुले आपत्ति प्रकट गर्नुभएको थियो ।

कर्णाली तथा दुगर्म क्षेत्रका जनताका लागि राहत दिने कार्यक्रम ल्याउन जोड दिँदै उहाँहरुले पाँच विकास क्षेत्रमा उच्च प्रविधियुक्त आवासीय विद्यालय स्थापना गर्नुपर्ने, दलित समुदायलाई राज्यको मूल प्रवाहमा ल्याउन विशेष ध्यान दिनुपर्ने धारणा राख्नुभयो ।

लामो समयदेखि चर्चामा रहेको पञ्चेश्वर बहुउद्देश्यीय आयोजनाको काम अगाडि नबढाइएकोमा सरकारको ध्यानाकर्षण गराउनुभयो ।

आजको बैठकमा देवकरणप्रसाद कलवार, कृपाराम राना, खड्गबहादुर बस्याल, ओफीलाल ओखेडाले आफ्नो धारणा राख्नुभएको थियो ।

नीति तथा कार्यक्रममाथिको छलफल आइतबारसम्म हुने जानकारी सभामुख सुवास नेम्वाङले बैठकमा जानकारी दिनुभयो ।