एक जनाको भरमा नेचुङ भन्सार

इनेप्लिज २०७२ असार २४ गते ३:२० मा प्रकाशित

Mustang_district_locationमुस्ताङ, २४ असार । मुस्ताङको छोसेर गाविसमा सञ्चालित नेचुङ भन्सार कार्यालय एक कर्मचारीको भरमा सञ्चालन भइरहेका छन् ।

कार्यालयको जीर्ण भवन अवस्थामा छ । शौचालय र बाथरुमको व्यवस्था छैन । झ्याल र ढोका कुहिएका छन् । भन्सार कार्यालयका प्रमुख नायब सुब्बा धर्मराज सुवेदीले सञ्चार सुविधाको अभाव र सहयोगी कर्मचारी नहुँदा समस्या भइरहेको बताउनुभयो ।

एक्काइस वर्षपछि असारको पहिलो सातादेखि मुस्ताङको कोरला नाकाबाट हुने कारोबारलाई व्यवस्थित बनाउन सञ्चालनमा आएको भन्सार कार्यालयमा भौतिक पूर्वाधार र जनशक्तिको अभावले कार्यसम्पादन प्रभावकारी बन्न सकेको छैन । कार्यालय सहयोगीसहित चार जनाको दरबन्दी भए पनि अहिलेसम्म दरबन्दी पूर्ति हुन नसकेको प्रमुख सुवेदीको भनाइ छ ।

कार्यालय सहयोगी स्थानीयलाई नियुक्त गर्न पाउने भए पनि विभागबाट कुनै किसिमको निर्देशन नआएकाले समस्या उत्पन्न भएको छ ।

दरबन्दीका अन्य दुई कर्मचारी काजमा अन्यत्रै खटिएका छन् । भौगोलिक रुपमा कठिन, समुदायस्तरमा पर्याप्त चेतना र थप जनशक्ति नहुँदा कार्यसम्पादन गर्न समस्या भएको प्रमुख सुवेदीको गुनासो छ । “राज्यले खटाएको ठाउँमा त आउनु नै प¥यो तर, पर्याप्त व्यवस्था नहुँदासम्म राज्यले सोचेको लक्ष्य यहाँबाट हासिल गर्न कठिन छ, उहाँले भन्नुभयो, “तत्काल दरबन्दी पूर्ति र आवश्यक पूर्वाधार निर्माणमा ध्यान दिन जरुरी छ ।”
तिब्बतको कैलाश मानव सरोवर जान चाहने भक्तजनका लागि कोरला नाकाको बाटो सबैभन्दा नजिक पर्छ । चीन र भारतले भारतको नाथुला नाकामार्फत भक्तजनलाई कैलाश जाने मार्ग खुल्ला गरेसँगै मुस्ताङका सरोकारवाला निकाय पनि कोरला नाका सञ्चालनको पक्षमा सरकारलाई दबाब दिइरहेका छन् ।

भन्सार कार्यालयमा आवश्यक पर्ने पूर्वाधारसहित करिब रु २० लाखको योजना विभागमा पठाइएको नेचुङ भन्सार कार्यालयले जनाएको छ । “यसमा विभाग सकारात्मक छ, बजेट आएर आधारभूत कुरा भयो भने हामी नियमित यहाँ बस्न कुनै समस्या हुनेछैन सुवेदीले भन्नुभयो ।

प्रतिक्रिया