उहाँले बुधबार बिहान प्रधानमन्त्री दैवी प्रकोप उद्धार कोषमा भूकम्पपीडितका लागि रकम सहयोग गर्न आएका विभिन्न संस्थाका प्रतिनिधिहरूको बीचमा बताउनुभएको हो ।

कोषमा एपेक्सको दस लाख सहयोग

विनाशकारी भूकम्पपीडित नेपालीलाई सघाउनका लागि एपेक्स कलेज काठमाडौँले प्रधानमन्त्री राहत कोषमा १० लाख रुपैयाँ सहयोग गरेको छ । आज प्रधानमन्त्री निवास बालुवाटारमा आयोजित एक कार्यक्रममा कलेजका अध्यक्ष एवम् सूचना तथा सञ्चारमन्त्री डा मीनेन्द्र रिजालले सो सहयोग रकमको चेक प्रधानमन्त्री कोइरालालाई हस्तान्तरण गर्नुभएको थियो ।

सहयोग हस्तान्तरण समारोहमा सञ्चारमन्त्री डा रिजालले कलेजले गत वर्ष मुलुकमा बाढीपहिरोले ठूलो जनधनको क्षति भएको समयमा पनि योगदान गरेको स्मरण गराउनुभएको थियो ।

सो अवसरमा प्रधानमन्त्री कोइरालाले मुलुकमा विपत्ति आएको बेलामा पीडितलाई सघाउनु सबैको कर्तव्य भएको बताउनुभयो । उहाँले सहयोगको यस्तो पुनित कार्यमा लाग्नुपर्ने बेलामा पनि कतिपय व्यक्ति नाफा कमाउन, पीडितका लागि जुटेको रकम र सामग्री हडप्न लागेका समाचार आएकाले त्यसप्रति चनाखो भएर निगरानी गर्न पनि आग्रह गर्नुभएको थियो ।

उहाँले सो अवसरमा स्वदेश र विदेशबाट हरेक नागरिकले आफ्नो पारिश्रमिक र गाँस काटेर दिएको रकम सदुपयोग गर्न सरकार प्रतिबद्ध रहेको तर सहयोगदाताले पनि यसमा निगरानी गर्नुपर्ने आवश्यकता रहेको बताउनुभयो ।

कोषमा बोर्डको पाँच करोड

आज प्रधानमन्त्री राहत कोषमा नेपाल पर्यटन बोर्डले पाँच करोड रुपैयाँ योगदान गरेको छ । बोर्डका अध्यक्ष एवम् पर्यटन तथा नागरिक उड्डयन सचिव सुरेशमान प्रधानले सो रकमको चेक प्रधानमन्त्री कोइरालालाई हस्तान्तरण गर्नुभएको थियो ।

नाम्स र वीर अस्पतालको रु ३६ लाख सहयोग

राष्ट्रिय चिकित्सा विज्ञान प्रतिष्ठान र वीर अस्पतालका तर्फबाट प्रधानमन्त्री दैवी प्रकोप उद्धार कोषमा ३६ लाख २३ हजार ४० रुपैयाँ ३१ पैसा सहयोग प्राप्त भएको छ ।

आज बिहान प्रधानमन्त्री निवास बालुवाटारमा आयोजित एक कार्यक्रममा प्रतिष्ठानका उपकुलपति डा गणेश गुरुङले प्रधानमन्त्री कोइरालालाई सो रकमको चेक हस्तान्तरण गर्नुभएको थियो ।

माछापुच्छ्रेको छब्बीस लाख

आजै प्रधानमन्त्री राहत कोषमा माछापुच्छ्रे बंैक लिमिटेडले २६ लाख ३३ हजार ७४१ रुपैयाँ ५५ पैसा सहयोग गरेको छ ।

सो सहयोग रकम बैंकका प्रमुख कार्यकारी अधिकृत तुलसीराम गौतमले प्रधानमन्त्री कोइरालालाई हस्तान्तरण गर्नुभएको थियो । सो अवसरमा बैंकका अध्यक्ष डा वीरेन्द्रप्रसाद महतोको पनि उपस्थिति थियो ।

जिटिएल टेलिकमको बाह्र लाख पचास हजार

आजै जिटिएल टेलिकमले प्रधानमन्त्री दैवी प्रकोप उद्धार कोषमा रु १२ लाख ५० हजार योगदान गरेको छ ।

संस्थाका तर्फबाट प्रमुख कार्यकारी अधिकृत वोसन सिंह राणा र कम्पनी सचिव नारायण महतले सो रकम प्रधानमन्त्री कोइरालालाई हस्तान्तरण गर्नुभएको थियो ।

यसैगरी, पेडियाट्रिक सोसाइटीले रु १२ लाख, बूढानीलकण्ठ स्कुलले रु सात लाख र गोङ्गबु आवास क्षेत्र सुधार समितिका तर्फबाट कोषमा १० लाख रुपैयाँ योगदान भएको छ ।

सो रकम समितिका अध्यक्षले प्रधानमन्त्री कोइरालालाई बुझाउनुभएको थियो ।

त्यस्तै, आजै ब्रह्माकुमारी राजयोग केन्द्र (ओम शान्ति परिवार)ले तीन लाख ३३ हजार ३१३ रुपैयाँको चेक पनि प्रधानमन्त्री कोइरालालाई हस्तान्तरण गरेको थियो ।