दाङ । चर्चित कलाकारहरु दिनेश डिसी र झरना थापाले दाङमा भूकम्प पीडितहरुको राहत संकलनमा सहयात्रा गरेका छन् । उत्सर्ग फिल्मस नेपाल दाङले भुकम्प पीडितहरुको राहत सहयोगका लागि आयोजना गरेको सांगीतिक कार्यक्रममा कलाकारहरु दिनेश डिसी र झरना थापाले निशुल्करुपमा आफ्नो सहभागिता जनाएपछि एक लाख बढी रकम बाढी पीडितका लागि कलाकार टिम उठाउन सफल भएको छ । प्रायोजक र टिकट बिना नै खुल्ला रुपमा आयोजना गरिएको सांगीतिक कार्यक्रममा कलाकार डिसी र थापाले सर्वसाधारणलाई आग्रह गरेपछि १० रुपैयाँ देखि ५० हजारसम्म सहयोग गरिएको थियो । साँझ साढ ४ बजे देखि ७ बजेसम्म आयोजना गरिएको कार्यक्रममा प्रमुख अतिथिका रुपमा दाङका प्रमुख जिल्ला अधिकारी लोकनाथ पौड्यालको उपस्थिति रहेको थियो । कार्यक्रममा स्वतस्फूर्तरुपमा १ लाख ३७ हजार ५ सय ३९ रुपैयाँ राहत संकलन भएको थियो । कार्यक्रममा आयोजकले अत्यन्त मितव्ययी तरिकाले खर्च गरेकाले यति धेरै रकम राहतका लागि बचेको हो । कार्यक्रममा अतिथिका रुपमा आएका कलाकारहरु डिसी र थापाले पारिश्रमिकका रुपमा कत्ति पनि रकम लिएनन । कलाकार डिसी र थापाले भूकम्प पीडितका लागि आफूहरुले केन्द्रमा पनि सहयोग अभियान जारी राखेकाले दाङबासीको हौसला थप्न आफूहरु आएको बताए । उत्सर्ग फिलिम्स नेपाल दाङको निदेर्शक केएल पीडितको अगुवाईमा व्यवसायीहरु यादव सैघाली, राजभक्त राना, महेन्द्र बुढाथोकी, लेखराज डिसी र पत्रकार सविन प्रियासनले बचेको उक्त रकम प्रधानमन्त्री राहतकोषमा जम्मा गरेर त्यसको बैंक भौचर प्रमुख जिल्ला अधिकारी लोकनाथ पौड्यालाई हस्तान्तरण गरेका थिए । दाङमा अहिलेसम्म सांगीतिक कार्यक्रम गरेर प्राकृतिक विपत्तीबाट समस्यामा परेकाहरुका लागि जिल्ला प्रशासन मार्फत नगद सहयोग गरिएको यो पहिलो घटना हो ।