मदन भण्डारी स्मृति गोल्डकप फुटबलको तयारी

झापा, २३ वैशाख । जननेता मदन भण्डारीको स्मृतिमा चौथो अन्तर्राष्ट्रिय मदन भण्डारी स्मृति गोल्डकप फुटबल प्रतियोगिता बैशाख अन्तिम साताबाट हुने भएको छ । आयोजक मदन भण्डारी स्मृति प्रष्ठिानले पत्रकार सम्मेलनको आयोजना गरी बैशाख २७ देखि ३ गतेसम्म अन्तराष्ट्रिय आमन्त्रण गोल्डकप सञ्चालन हुने जानकारी गराएको हो । फुटबल प्रेमीहरूको बाहुल्यता रहेको उर्लाबारीमा प्रतिष्ठानको आयोजनामा वर्षेनी प्रतियोगिता आयोजना गर्दा उर्लाबारीलाई शोभायमान बनाउन एउटा महत्वपूर्ण भूमिका खेल्ने देखिन्छ । राष्ट्रिय तथा अन्तराष्ट्रिय स्तरका खेलाडीलाई उर्लाबारी मंगरबारेको मैदानमा उतारेर प्रतिष्ठानले आफूलाई खेलकुदीय भूमिको रूपमा स्थापित गराउन सफल भएको देखिन्छ । स्थानीय सालबारी सामुदायिक वन क्षेत्रको खेलमैदानमा हुने फुटबल प्रतियोगितामा भारतका दुई टिम र नेपालका ६ टिम गरी ८ टिमको सहभागिता रहने छ । यसले गर्दा खेल एकदमै रोमाञ्चक हुने खेलप्रेमीहरूको विश्वास छ । प्रतियोगितामा राष्ट्रिय जागृति क्लब इटहरी, दमक फूटबल क्लब, सशस्त्र प्रहरीको पाथीभरा गण लखनपुर, चर्च ब्वाइज युनाइटेड क्लब काठमाडौं, झापा ११, आयोजकका साथै भारतका दार्जिलिङ ११ र कञ्चनजंघा फूटबल क्लब सिलगुडी सहभागि हुने भएका छन् । खेल आयोजना बारे जानकारी गराउँदै गोल्डकप आयोजक समितिका संयोजक भूपालसिंह जिमीले फूटबलको विकासमा योगदान पु¥याउँदै व्यवसायिक फूटबल खेलाडी उत्पादनमा सहयोग गर्ने, स्थानीय पर्यटन विकास, प्रवद्र्धन र समृद्ध समाज निर्माणका लागि सहयोग गर्ने, युवा जनशक्ति विकास, अनुशासन गतिशिल बनाउने उद्देश्य रहेको बताउनुभयो । उहाँले वैशाख १२ गतेको विनाशकारी भूकम्पबाट त्रसित मानिसहरुको मनस्थितिलाई खेलले सामान्यीकरण गर्ने र मनोरञ्जन प्रदान गरी सामाजिक अन्तरघुलनमा सहयोग गर्ने बताउनुभयो । एमालेका पूर्व महासचिव एवं जननेता स्व. मदन भण्डारीको स्मृतिमा चार बर्ष अघिदेखि प्रत्येक बर्ष आयोजना हुँदै आएको गोल्डकपमा यसपटक पूर्वका हजारौं दर्शकले खेल हेर्ने आयोजकको अनुमान छ । यसबर्ष पुरस्कारको राशीमा पनि बृद्धि गरिएको छ । गोल्डकपको विजेताले नगद एक लाख ५० हजार र उपविजेताले एक लाख नगद सहित ट्रफि, मेडल र प्रमाणपत्र प्राप्त गर्ने आयोजक समितिका सचिव रूद्रबहादुर तामाङले बताउनुभयो । गतबर्ष विजेतालाई एक लाख र उपविजेतालाई ५० हजार नगद पुरस्कार दिइएको थियो । आयोजकले खेल सञ्चालनबाट १६ लाख ५० हजार आम्दानी हुने र १४ लाख २५ हजार खर्च हुने अनुमान गरेको छ । गोल्डकपबाट बचत भएको रकम भूकम्प पीडित राहत कोषमा जम्मा गरिने तामाङले बताउनुभयो । गोल्डकपको तयारी तीब्र पारिएको जनाउँदै आयोजक समितिका सहसंयोजक पुष्प ढकालले खेल व्यवस्थापनको जिम्मा फूटबल क्लब मंगलबारे र सालबारी एकता क्लबलाई दिइएको बताउनुभयो । खेल मैदानको स्तरोन्नतिको काम भइरहेको आयोजक समितिका सदस्य एवं फूटबल क्लब मंगलबारेका अध्यक्ष सञ्जिब बुढाथोकीले बताउनुभयो । उहाँले मञ्च बनाउने तथा मैदान सम्याउने काम भइरहेको जानकारी दिनुभयो । पत्रकार सम्मेलनमा मदन भण्डारी स्मृति प्रतिष्ठानका बरिष्ठ उपाध्यक्ष रोमनाथ ओली, सचिव युवराज भट्टराई, कार्यकारी निर्देशक निरज थापा लगायतको उपस्थिति थियो । यसैबीच, आयोजकले १६ बर्ष मुनिको राष्ट्रिय टिमका खेलाडी रूपेश तामाङको कप्तानीमा खेलाडी मैदानमा उतार्ने जनाएको छ । जननेता भण्डारीको स्मृति दिवस जेठ ३ गतेको अवसर पारी गोल्डकपको फाइनल खेल हुने जनाउँदै आयोजक समितिले फाइनलको पूर्वसन्ध्यामा जेठ २ गते स्थानीय पत्रकार र आयोजकबीच मैत्रीपूर्ण फूटबल हुने पनि जनाएको छ । गोल्डकपको उद्घाटन युवा तथा खेलकुद मन्त्री पुरूषोत्तम पौडेलले गर्ने तथा समापनमा एमाले उपाध्यक्ष एवं प्रतिष्ठानकी संरक्षक विद्यादेवी भण्डारीको प्रमुख आतिथ्य रहने बताइएको छ ।