नेपाल स्काउटका प्रमुख आयुक्त रविन दाहालका अनुसार सबैभन्दा बढी काठमाडौँमा एक हजार १३७ जना स्काउट परिचालन गरिएको छ । जसमध्ये काठमाडौँको वसन्तपुर क्षेत्र, साँखु र ककनी, खटाइएको छ ।

यसैगरी ललितपुरको सानागाउँ, लुभू, खोकना, बुङ्मती, ठेँचो, हरिसिद्धिलगायतका ठाउँमा ५३४ तथा भक्तपुरको थिमि र भक्तपुर नगरमा १५० स्काउट स्वयम्सेवक खटाएका छन् ।

यसका साथै भूकम्प प्रभावित जिल्ला सिन्धुपाल्चोक, नुवाकोट, कास्की, गोरखा, सुनसरी, रामेछाप, दैलेख, मकवानपुर, रसुवा, धादिङ, मोरङ र पर्सामा स्काउट स्वयम्सेवक खटाइएको छ ।

धेरै स्काउटले व्यक्तिगत रुपमा आ–आफ्नो क्षेत्रबाट उद्धार तथा राहत वितरण कार्यमा नेपाली सेना, नेपाल प्रहरी र सशस्त्र प्रहरीसँग मिलेर काम गरिरहेको पनि प्रमुख आयुक्त दाहालले बताउनुभयो ।

नेपाल स्काउटका रोभर लिडर तथा स्काउट शिक्षक शिवराम अर्याल, रन्जनलाल श्रेष्ठ, दीपेश केसी, बलराम प्यासी धर्मभक्त मल्ल र प्रमोद सिग्देलको नेतृत्वमा काठमाडौँ तथा केशव महर्जन, सत्यनारायण शाही र नरेश महर्जनको नेतृत्वमा ललितपुरमा स्काउट परिचालन गरिएको छ ।

स्काउटले यतिखेर घाइतेलाई राहत, उद्धार तथा उपचारका साथै भत्किएका घरबाट खाद्यान्न तथा सम्पत्ति निकाल्न सहयोग गरिरहेका छन् भने राजधानीको वसन्तपुर र हनुमानढोका क्षेत्रबाट ऐतिहासिक सम्पदाको संरक्षण र सङ्कलन गरिरहेका छन् ।

नेपाल स्काउटमार्फत यतिखेर भारत स्काउट तथा गाइड्स एसोसिएसन, बङ्गलादेश स्काउट तथा भियतनाम स्काउटले मिलेर राजधानी तथा आसपासका जिल्लामा भूकम्पपीडितका लागि उद्धारका कार्य गरिरहेका छन् ।