शारीरिकरुपमा अशक्त मानिने अपाङ्गता भएका व्यक्तिको सहयोगका लागि सूचना केन्द्र स्थापना गरिएको राष्ट्रिय अपाङ्ग सेवा सङ्घ प्यूठानका अध्यक्ष जुमानसिंह केसीले बताउनुभयो । महिला तथा बालबालिका कार्यालयको रु ५० हजारको आर्थिक सहयोगमा सूचना केन्द्रको स्थापना गरिएको हो ।

केन्द्रको मङ्गलबार उद्घाटन गर्दै सहायक प्रमुख जिल्ला अधिकारी भुपबहादुर पुनले केन्द्रले अपाङ्गता भएका व्यक्तिलाई राज्यले दिएका सेवा र राज्य पक्षलाई अपाङ्गता भएका व्यक्तिका बारेमा जानकारी लिन सहज हुने भन्दै केन्द्रको दिगो व्यवस्थापन आवश्यक रहेको बताउनुभयो ।

जिल्ला विकास समिति प्यूठानका सामाजिक विकास अधिकृत चन्द्रबहादुर जिसी र गैरसरकारी संस्था महासङ्घ प्यूठानका अध्यक्ष रमेश श्रेष्ठले अपाङ्गता सूचना केन्द्रको सञ्चालनमा आ–आफ्नो क्षेत्रबाट सक्दो सहयोग गर्ने आश्वासन दिनुभयो ।

विसं २०६८ को जनगणनाअनुसार प्यूठान जिल्लामा पाँच हजार ९३२ अपाङ्गता भएका व्यक्ति रहेका छन् । राज्यले समस्याका आधारमा अपाङ्गता भएका व्यक्तिलाई चार भागमा विभाजन गरेको छ ।