शुक्रबार, मंसिर १२ २०७७
काठमाडौं ०६:४६
वासिङटन डिसी 20:01

आइपीएलमा मुम्बई र राजस्थान रोयल्सको शानदार जित

इनेप्लिज २०७२ वैशाख ७ गते १६:२८ मा प्रकाशित

IPL-8-Rajasthan-Royals-Jersey-2015-Shilpa-Shetty-and-Raj-Kundraकाठमाडौं, ७ वैशाख । इन्डियन प्रियिमर लिग (आइपीएल) ट्वेन्टी–२० क्रिकेटअन्तर्गत आइतबारका खेलहरुमा राजस्थान रोयल्स र मुम्बई इन्डियन्स विजयी भएका छन् ।

जारी सिजनमा पहिलो जित हात पारेको मुम्बईले रोयल च्यालेन्जर्स बैंग्लोरलाई १८ रनले हरायो । खेलमा पहिले ब्याटिङ गरेको मुम्बईले निर्धारित २० ओभरमा ७ विकेट गुमाएर २ सय ९ रन बनायो । मुम्बईका लागि लेन्डल सिमोन्सले ५९ रन तथा उन्मुक्त चन्दले ५८ रन जोडे ।

जवाफमा २ सय १० रनको विशाल लक्ष्य पछ्याएको बैंग्लोरले १ सय ९७ रन मात्रै बनाउन सक्यो । बैंग्लोरका लागि डेभिड वाईजले अविजित ४७ रन तथा एबी डे भिलायर्सले ४१ रन जोडे । जितसँगै मुम्बई इन्डियन्सले लगातार हारको श्रृंखला तोड्दै अंक तालिकामा खाता खोलेको छ ।

आइतबारै भएको अर्को खेलमा चेन्नई सुपर किंग्समाथि ८ विकेटको शानदार जित हासिल गर्दै राजस्थान रोयल्सले अपराजित यात्रालाई कायमै राखेको हो ।

राजस्थानको ५ खेलबाट १० अंक भएको छ भने ४ खेलबाट ६ अंकको चेन्नई दोस्रो स्थानमा छ । खेलमा टस जितेर पहिले ब्याटिङ गरेको चेन्नईले ४ विकेट गुमाउँदै एक सय ५६ रन बनायो ।

पाँचौं विकेटका लागि अविजित ९१ रनको साझेदारी गर्ने क्रममा ड्वेन ब्राभोले ६२ तथा महेन्द्र सिंह धोनीले ३१ रन जोडे ।

जवाफमा राजस्थानले १८ ओभर २ बलमा २ विकेट गुमाएर विजय हासिल गर्‍यो । पहिलो विकेटका लागि १ सय ४४ रनको साझेदारी गर्नेक्रममा सेन वाट्सनले ४७ बलमा ७३ तथा अजिन्क्या रहानेले अविजित रहँदै ५५ बलमा ७६ रन जोडे । तस्वीरः एजेन्सी

प्रतिक्रिया