शनिबार, मंसिर २० २०७७
काठमाडौं १७:०४
वासिङटन डिसी 06:19

जाजरकोटमा फैलिएको स्वाइन फ्लुबारे सरकार सचेत छ: मन्त्री अधिकारी

इनेप्लिज २०७२ वैशाख ७ गते १२:१८ मा प्रकाशित

Khagaraj Adhikariकाठमाडौँ, ७ वैशाख । स्वास्थ्य तथा जनसङ्ख्या मन्त्री खगराज अधिकारीले जाजरकोटमा फैलिएको स्वाइन फ्लुबारे सरकार पूर्ण सचेत रहेको बताउनुभएको छ ।

रिपोर्टर्स क्लब नेपालले आज यहाँ आयोजना गरेको साक्षात्कार कार्यक्रममा मन्त्री अधिकारीले जाजरकोट र त्यस वरपर फैलिएको स्वाइन फ्लुलाई नियन्त्रणमा लिन सरकारले आवश्यक सङ्ख्यामा चिकित्सक खटाएकोे जानकारी दिनुभयो ।

उहाँले जिल्लाका अछामी, जगा, थापाचौर, सीमालगायतको ठाउँमा नेपाली सेना, जनपथ, सशस्त्र प्रहरीलगायतको चिकित्सक टोली पुगेर काम थालिसकेको पनि जानकारी दिनुभयो ।

बिरामी भएको ठाउँमा चिकित्सकसँग भेटिएका बिरामीले मृत्युवरण गर्न नपरेको उहाँको भनाइ थियो ।

उहाँले उपचारका लागि जाजरकोट र मध्यपश्चिमका विभिन्न क्षेत्रमा रकमसमेत विनियोजन गरेको र जाजरकोट, रुकुम, सुर्खेत, दैलेख, जुम्लालगायतका जिल्लामा जनस्वास्थ्य कार्यालयमार्फत काम अगाडि बढाइएको बताउनुभयो ।

उहाँका अनुसार ती जिल्लामा काम गर्ने चिकित्सकलाई २४ घन्टाभित्र जिल्ला फर्कन यसअघि नै आग्रह गरी सकिएको छ ।

बिरामीको छिटो उपचार होस् भन्नका लागि सुर्खेतसम्म हेलिकप्टरको व्यवस्था गर्न लागेको मन्त्रालयले जनाएको छ । अहिलेसम्म जाजरकोटमा मरेकामध्ये २५ प्रतिशत स्वाइन फ्लुबाट सङ्क्रमित रहेको बताइएको छ ।

प्रतिक्रिया