इनेप्लिज
२०७२ वैशाख ६ गते १४:४९ मा प्रकाशित
काठमाडौँ, ६ वैशाख । निजी विद्यालयले बढाएको शुल्कविरुद्व आन्दोलन गर्ने क्रममा पक्राउ परेका दुई विद्यार्थी नेता आज रिहाई भएका छन् ।
आन्दोलनरत् विद्यार्थीहरुले आफ्ना पक्राउ परेका साथीहरु नछुटेसम्म वार्ता नगर्ने सर्त राखेपछि पूर्वनिर्धारित समयमा आज दिउँसो २ बजे हुने भनिएको विद्यार्थी सङ्गठन र सरोकारवाला पक्षबीचको वार्ता स्थगित भएको थियो ।
कैलालीका अखिल (क्रान्तिकारी)का अध्यक्ष वीरेन्द्र विक र अनेरास्ववियुका अध्यक्ष चुडामणि भट्टको रिहाईपछि शिक्षा मन्त्रालयमा अहिले वार्ता भइरहेको अनेरास्ववियु (क्रान्तिकारी) का कोषाध्यक्ष लालबहादुर तामाङले जानकारी दिनुभयो ।
जिल्ला शिक्षा कार्यालयको अनुमतिमा २२ प्रतिशतदेखि ४४ प्रतिशतसम्म विद्यालयले शुल्क वृद्धि गरेपछि विभिन्न नौ विद्यार्थी सङ्गठन आन्दोलनमा उत्रिएका थिए ।
उनीहरुले विद्यालयको भर्ना प्रक्रिया अवरोध गर्नेदेखि विद्यालय बन्द गर्ने, सरोकारवालासँग अन्तक्र्रिया गर्ने, धर्नालगायतका चरणबद्ध आन्दोलनको घोषणा गरेका थिए ।
प्रतिक्रिया