पूर्वप्रधानमन्त्री थापाको निधनमा नेपाल शोकमा, थापालाई राष्ट्रिय सम्मान दिइने

काठमाडौँ, ३ वैशाख । पूर्वप्रधानमन्त्री सूर्यबहादुर थापाको निधनमा सिंगो देश शोकमा डुबेको छ ।

राष्ट्रिय प्रजातन्त्र पार्टी नेपालका नेता पद्मसुन्दर लावतीले लामो समय राष्ट्र र जनताका सेवामा निरन्तर कार्यरत वरिष्ठ राजनीतिज्ञ एवं पूर्वप्रधानमन्त्री सूर्यबहादुर थापाको उपचारका क्रममा भएको निधनप्रति दुःख व्यक्त गर्नुभएको छ ।

उहाँले प्रेस विज्ञप्तिमार्फत शोकसन्तप्त परिवारप्रति समवेदना पनि प्रकट गर्नुभएको छ ।

यसै गरी राष्ट्रिय प्रजातन्त्र पार्टी केन्द्रीय समितिको आज बसेको आकस्मिक बैठकले पार्टी वरिष्ठ नेता एवम् पूर्वप्रधानमन्त्री थापाको निधनप्रति दुःख व्यक्त गर्दै शोकप्रस्ताव पारित गरेको छ ।

पार्टीका अध्यक्ष पशुपतिशम्शेर जबराको निवास महाराजगन्जमा बसेको बैठकले नेता थापाको बुधबार राति भारतको मेदान्त अस्पतालमा उपचारको क्रममा आकस्मिक निधनबाट पार्टीलाई गम्भीर बनाएको जनाएको छ ।

सो प्रस्तावमा मुलुक सङ्क्रमणकालमा लम्बिँदै गएको अवस्थामा सहमतिबाट यथाशीघ्र संविधान निर्माण गर्नुपर्छ भन्ने एक राजनेता मुलुकले गुमाएको र यो पार्टी र मुलुकका लागि अपूरणाीय क्षति भएको उल्लेख छ ।

बैठकले शोकसन्तप्त परिवारजनप्रति समवेदना प्रकट गर्दै दिवङ्गत आत्माको चिरशान्तिको कामनासमेत गरेको छ । थापाको पार्थिव शरीर भारतीय सरकारको विशेष विमानद्वारा आज अपराह्न काठमाडौँ ल्याइने भएको छ । काठमाडौँ ल्याइएपछि थापाको पार्थिव शरीरलाई उहाँको निजी निवास मालीगाउँमा शुक्रबार बिहानसम्म राखिने पार्टीका सहप्रवक्ता किरण गिरीले जानकारी दिनुभयो ।

त्यस्तै शुक्रबार बिहान १० बजे पार्टी कार्यालय चाबहिल र त्यसपछि सार्वजनिक श्रद्धाञ्जलिका लागि मध्याह्न १२ बजे दशरथ रङ्गशालामा राखिने बताइएको छ । पूर्वप्रधानमन्त्री थापाको शुक्रबार नै पशुपति आर्यघाटमा अन्त्येष्टि गरिने राप्रपाले जनाएको छ ।

चन्दबाट समवेदना
वरिष्ठ नेता थापाको निधनप्रति राप्रपाका नेता लोकेन्द्रबहादुर चन्द नेतृत्वले पनि विज्ञप्ति जारी गरी समवेदना व्यक्त गरेको छ । सो नेतृत्वले आज अपराह्न १ बजे आकस्मिक बैठक बोलाएको पार्टीका प्रचार प्रसार समितिका संयोजक मीना सुवेदीले जारी गरेको विज्ञप्तिमा जनाइएको छ । रासस