कार्यसमितिका पदाधिकारी चयन गर्न सुरु गरिएको निर्वाचन प्रक्रियामा अध्यक्ष पदमा वर्तमान अध्यक्ष थापाबाहेक अरू कसैको उम्मेदवारी नपरेकाले उहाँ निर्विरोध निर्वाचित हुनुभएको रेडक्रस सोसाइटीका सञ्चार विभाग प्रमुख दिव्यराज पौडेलले बताउनुभयो ।

अध्यक्षमा निर्वाचित थापा केन्द्रीय कार्य समितिको अध्यक्षमा यसअघि दुई कार्यकालका लागि पनि निर्वाचित हुनुभएको थियो । केन्द्रीय कार्य समितिको कार्यकाल चार वर्षको हुन्छ ।

केन्द्रीय कार्य समितिका अन्य २२ सदस्य पदका लागि भने ४६ जनाको उम्मेदवारी परेको जनाइएको छ । मतदानको प्रक्रियाद्वारा आज सदस्यको चयन हुने बताइएको छ ।

अधिवेशनले रक्तसञ्चार, एम्बुलेन्स सेवा सञ्चालन, विपद् व्यवस्थापनलगायतका आकस्मिक सेवाहरु सञ्चालनको सन्दर्भमा सरकारसँगको सहकार्यलाई बढाउने, सहरी क्षेत्रमा केन्द्रीय क्रियाकलाप बढाउने, आप्रवासन, हिंसा न्यूनीकरण, शान्ति प्रवद्र्धन गर्नेसम्बन्धी प्रस्ताव पारित गरेको छ ।

यसैगरी, जुनियर तथा युवा रेडक्रस सर्कलको कार्य क्षेत्र थप विस्तार गर्ने, गाउँस्तरसम्म मानवताका लागि हुने क्रियाकलापलाई थप सशक्त बनाउने प्रस्ताव पनि पारित गरेको पौडेलले बताउनुभयो ।

यस्तै, स्वास्थ्य प्रवद्र्धन र विपद् व्यवस्थापनलाई प्रमुख प्राथमिकतामा राखेर प्रस्तुत गरिएको आगामी आर्थिक वर्षको रु एक अर्ब ३३ करोडको बजेटसमेत पारित गरिएको छ । प्रस्तुत बजेटमध्ये साधारणतर्फ रु २३ करोड र विकासतर्फ रु एक अर्ब १० करोड रहेको छ ।

तीन जिल्ला शाखा उत्कृष्ट भई पुरस्कृत

अधिवेशनबाट गत वर्ष रेडक्रसका क्रियाकलापलाई प्रभावकारी बनाएबापत रेडक्रसको पर्सा, कास्की र चितवन जिल्ला शाखालाई क्रमशः पहिलो, दोस्रो र तेस्रो घोषित गरी पुरस्कृतसमेत गरिएको छ ।

यसैगरी, अधिवेशनले प्रत्येक जिल्ला शाखामा स्वास्थ्य प्रवद्र्धन कोष खडा गर्नेसम्बन्धी प्रस्ताव पारित गरेको छ । अधिवेशन आज सकिँदैछ ।