बिहीबार, मंसिर १८ २०७७
काठमाडौं १०:३२
वासिङटन डिसी 23:47

सहमति हुनेमा अध्यक्ष नेम्वाङको विश्वास

इनेप्लिज २०७१ चैत २७ गते १८:३९ मा प्रकाशित

Subash-Nemwang

काठमाडौँ, २७ चैत । संविधानसभाका अध्यक्ष सुवासचन्द्र नेम्वाङले यही चैत ३० गतेभित्र संविधानका विवादित विषयमा सहमति जुट्ने विश्वास व्यक्त गर्नुभएको छ ।

पछिल्ला दिनमा प्रमुख दलका नेताबीच अनौपचारिक छलफल चलिरहेको र सङ्घीयतालगायत विवादित विषयमा सहमतिको प्रयास भइरहेकाले सो दिन भित्र सहमति हुने उहाँले बताउनुभयो ।

आज रासससँग कुरा गर्दै अध्यक्ष नेम्वाङले भन्नुभयो, “सहमति जुटाउनका लागि भरमग्दुर प्रयास भइरहेको छ, सत्तारूढ र विपक्षी दल सहमतिका लागि अग्रसर देखिएका छन्, मलाई आशा छ, सहमति हुन्छ ।”

उहाँले आफू ती दलसँग निरन्तर परामर्शमा रहेको र दूवै पक्ष सहमतिका लागि तयार रहेको आफूले पाएको पनि बताउनुभयो ।

बिहीबार एमाओवादीका अध्यक्ष पुष्पकमल दाहालसँग भएको आफ्नो भेटवार्ताबारे स्पष्ट पार्दै अध्यक्ष नेम्वाङले आमहडताल फिर्ता लिइएको अवस्थामा दलहरूबीच वार्ता र विश्वासको वातावरण बनेको जनाउनुभयो ।

अनौपचारिक छलफललाई निरन्तरता दिन र विषयमा टुङ्गोमा पुग्ने स्थिति भएपछि औपचारिक र शीर्ष तहमा छलफल हुने देखिएको छ । अध्यक्ष नेम्वाङले ती दलका प्रमुख सचेतक र दोस्रो तहका नेतासँग पनि अनौपचारिक परामर्श गर्दै आउनुभएको छ ।

संविधानसभाको बैठक यही ३० गते दिनको ३ बजे बस्दैछ ।

प्रतिक्रिया