इरानसँगको आणविक वार्ता ऐतिहासिक समझदारीमा पुगेको शक्ति राष्ट्रहरुको भनाई

काठमाडौ, २० चैत । आणविक हतियार विकास गर्न लागेको भनि नाकाबन्दी लगाएका विश्वका शक्ति राष्ट्रहरुले इरानको विवादास्पद आणविक कार्यक्रमको भावी स्वरुपबारे सहमति गरेको दाबी गरेका छन् ।

स्वीट्जरल्यान्डमा ८ दिनसम्म चलेको गहन छलफलपछि इरान र शक्ति राष्ट्रहरुले आणविक कार्यक्रमको भावी रुपरेखामा सहमति जुटाएका हुन् । यद्यपि, यो सहमतिलाई लिखित सम्झौतामा ढाल्न भने बाँकी रहेको बताइएको छ ।

अमेरिकी राष्ट्रपति बाराक ओबामाले इरानको आणविक कार्यक्रमबारे ‘ऐतिहासिक समझदारी’ गरिएको बताएका छन् ।

युरोपियन युनियनको अगुवाइमा संयुक्त राष्ट्रसंघका ५ स्थायी सदस्य राष्ट्रह अमेरिका, रुस, बेलायत, चीन र फ्रान्ससहित जर्मनी सम्मिलित वार्ताले इरानलाई उसको आणविक कार्यक्रम अन्तराष्ट्रिय नियमन र सम्झौताअनुसार अघि बढाउन सहमत गराएको हो ।

सम्झौता अनुसार इरानले आफ्नो आणविक कार्यक्रमलाई दुई तिहाइले घटाउनेछ । इरानले युरेनियम प्रशोधन घटाएपछि अमेरिका र युरोपियन युनियनले उसमाथि लगाएको नाकावन्दी र प्रतिबन्ध क्रमिकरुपले घटाउँदै लैजाने छन् ।

बहुराष्ट्रिय वार्तामा जुटेका समझदारीले यही जुन ३० तारिखसम्ममा मस्यौदा बनाएर विस्तृत आणविक सम्झौता गरिने छ । (एजेन्सी)