“वार्षिक चार लाख किलोग्रामभन्दा बढीको माग भए पनि थोरै मात्र निर्यात गर्न सकेका छौँ”–अमेरिकामा छुर्पी बिक्री गर्दै आउनुभएका हिमालयन कर्पोरेसनका सुजन श्रेष्ठले भन्नुभयो । हिमालयन डग ट्यु ब्रान्डमा नेपाली छुर्पी अमेरिकालगायत देशमा निर्यात हुन थालेको छ । १० वर्षदेखि मुख्य गरी अमेरिका, क्यानडा, मेक्सिको, जापानमा कुकुरको आहाराका लागि नेपाली छुर्पी लगिँदै आएको छ । नेपालबाट करिब छ लाख किलोग्रामभन्दा बढी छुर्पी माग भए पनि पुर्‍याउन नसकेको श्रेष्ठ बताउनुहुन्छ ।

इलाम, तेह्रथुम र ताप्लेजुङका डेरी उद्योगहरूमा उत्पादन भएको छुर्पी सङ्कलन गरेर ग्रेडिङ गरेपछि विदेश निर्यात गर्न योग्य हुन्छ । ग्रेडिङका आधारमा प्रतिकिलोग्राम रु ३५० देखि ६५० सम्मका दरले छुर्पी बिक्री गरिन्छ । अमेरिकामा मात्रै चार लाख किलोग्रामको माग आएपछि वार्षिक दुई लाख किलोग्राम छुर्पी अमेरिकामै उत्पादन गर्न थालिएको श्रेष्ठले बताउनुभयो ।

इलाममा मात्रै १०१ वटा छुर्पी उद्योग छन् । कम लगानीमा स्थापना भएका उद्योगले गुणस्तरीय छुर्पी उत्पादन नगर्ने किसानको भनाइ छ । हिमालयन कर्पोरेसनले कुकुरका लागि चाहिने छुर्पी बनाउन अहिले उद्योग सञ्चालकलाई तालिम गराउँदै आएको छ । माग बढेपछि अन्य कम्पनीले समेत छुर्पी निर्यात गर्न थालेका छन् ।