विश्वविद्यालयलाई अन्तर्राष्ट्रिय पहिचान दिलाउन र नेपालमा पनि फरक शैक्षिक संस्थाका रुपमा स्थापित गर्ने गरी प्राज्ञिक गुरुयोजनाको थालनी भएको हो । प्राज्ञिक गुरुयोजना निर्माण समितिले तीन साता लगाएर बनाएको गुरुयोजनाको प्रारम्भिक मस्यौदाको पहिलो पटक शनिबार बुटवलमा विश्वविद्यालयका उपकुलपति डा नरेशमान वज्राचार्यले सार्वजनिक गर्दै विश्वविद्यालयलाई कसरी फरक र प्राज्ञिक बनाउने भन्ने उद्देश्यका साथ गुरुयोजना निर्माण थालिएको बताउनुभयो ।
गुरुयोजना निर्माणका लागि वज्राचार्यकै संयोजकत्वमा सात सदस्यीय समिति निर्माण गरिएको छ । मस्यौदामा विश्वविद्यालयमा थेरवाद, महायान, वज्रयान, बौद्ध इतिहास, बौद्ध कला र पुरातत्व, हिमाली बौद्धधर्म, बौद्धधर्म र ध्यान, पर्यटन र पथप्रदर्शनलगायत विभाग राखिएको छ ।
अहिले स्नातकोत्तर र विद्यावारिधि कार्यक्रम सञ्चालन गरेको विश्विद्यालयको गुरुयोजना मस्यौदामा प्रमाणपत्र तह र स्नातक तहलाई समेत समावेश गर्ने बताइएको छ । बौद्ध ग्रन्थ लेखिएका पाली, संस्कृत, तिब्बती र चिनियाँ भाषा तथा साहित्यमा प्रमाणपत्र तह र स्नातक तह चलाउन सकिने प्रस्ताव समितिको छ । पोस्ट ग्य्राजुएट डिप्लोमाको व्यवस्था पनि गरिएको छ । यो कार्यक्रम एक वर्षको हुनेछ ।

विश्वविद्यालयमा अन्तर्राष्ट्रिय आकर्षण बढाउन विदेशी विज्ञलाई मानार्थ उपाधि दिन सकिने व्यवस्थासमेत मस्यौदामा छ । त्यस अवसरमा सभासद् भरतकुमार शाहले बौद्ध दर्शनलाई मूल विषय बनाएर अन्य विषय पनि जोड्नुपर्ने बताउनुभयो ।