इनेप्लिज
२०७१ फागुन २४ गते २:५४ मा प्रकाशित
गजुरी (धादिङ), २४ फागुन । नेपाली काँग्रेस धादिङले सरकारसमक्ष अन्तर्राष्ट्रिय विमानस्थल निर्माणका लागि धादिङको सल्यानटार प्रस्ताव गरेको छ ।
देशमा एक मात्र अन्तर्राष्ट्रिय विमानस्थल हुँदा निकै समस्या परेको बताउँदै सूचना तथा सञ्चारमन्त्रीलाई शनिबार बुझाइएको काँग्रेस धादिङका सभापति रामनाथ अधिकारीद्वारा हस्ताक्षरित प्रस्तावपत्रमा धादिङ जिल्लाको उत्तरी क्षेत्रअन्तर्गत सल्यानटार गाविसमा पर्ने सल्यानटारको १३ किमी लम्बाइ र तीन किमी चौडाइमा फैलिएको जग्गा विमानस्थलका लागि उपयुक्त हुने अवगत गराइएको छ ।
सल्यानटारनजिकै बूढीगण्डकी परियोजना सञ्चालन हुन लागिरहेको छ । अन्तर्राष्ट्रिय उडान हुँदा पर्यटकलाई बूढीगण्डकी ताल अवलोकन गर्नका लागि उपयुक्त हुनाका साथै अन्नपूर्ण, मनास्लु, लाङटाङ, गौरीशङ्कर, गणेश, पाविल र पाल्दोर हिमालको मनोरम दृश्यसहित सल्यानटार अवतरण गर्न सकिने उत्तमस्थलका रुपमा सल्यानटार मानिन्छ ।
यसअघि सल्यानटारमा सहायक विमानस्थल बनाउनका लागि पर्यटन मन्त्रालयबाट सर्भेसहितका काम भइसकेको र केही रकमसमेत खर्च भएकाले सो कार्यलाई थप अध्ययन गरी काम अगाडि बढाउन नेता अधिकारीले मन्त्री रिजालमार्फत सरकारलाई आग्रह गर्नुभएको छ ।
प्रतिक्रिया