माओवादीलाई सर्त नराखी वार्तामा आउन भट्टराईको आग्रह

झापा, १९ फागुन । नेकपा एमालेका सचिव योगेश भट्टराईले एकीकृत नेकपा माओवादीलाई कुनै पनि सर्त नराखी वार्तामा आउन आग्रह गर्नुभएको छ ।

आज प्रेस चौतारी झापाले आयोजना गरेको पत्रकार सम्मेलनमा बोल्दै उहाँले भन्नुभयो – नेपाली काँग्रेस नेतृत्वको सरकार इतिहासकै कमजोर सरकार भयो । संविधान बनाउनकै लागि भए पनि हामीहरु कमजोर सरकारमा सहभागी हुनुपरेको छ ।

सचिव भट्टराईले एमाओवादीको हठका कारण माघ ८ मा संविधान आउन नसकेको बताउनुभयो । बाह्र बुँदे सहमतिको बाटोबाट अघि बढ्नुपर्ने धारणा राख्दै उहाँले जेठ १५ भित्र संविधान बन्नुपर्छ भन्नुभयो । उहाँले सहमति हुन नसके प्रक्रियाबाटै संविधान निर्माण प्रक्रिया अघि बढाइने पनि प्रस्ट पार्नुभयो ।