खराव मौसमका कारण प्याराग्लाइडिङको प्रि–वर्ल्ड कपअन्तर्गतको आजको खेल स्थगित

पोखरा, १८ फागुन । पोखरामा सुरु भएको प्याराग्लाइडिङ खेलकोे प्रि–वर्ल्डकपअन्तर्गत आज पनि खराव मौसमका कारण सम्पूर्ण उडान स्थगित भएका छन् ।

शनिबारदेखि पोखराको आकाशमा बादल लागेर आकाश खुल्न नसकेपछि टाक्स कमिटीले आज पनि सम्पूर्ण उडान स्थगित भएको जनाएको हो ।

शनिबारको प्रतिस्पर्धाको सम्पूर्ण प्याग्लाइडिङ उडान रद्द भएको थियो भने प्रतिस्पर्धाको दोस्रो र तेस्रो दिन पनि खेल स्थगित हुन पुगेको छ ।

शनिबार दिउँसोदेखि पोखरामा पानी परिरहेको र आकाश बादलले ढाकेकाले तीन दिनदेखि घामसमेत लाग्न सकेको छैन ।

प्याराग्लाइडिङ उडान गर्न उपयुक्त वातावरण नभएका कारणले गर्दा लगातार तीन दिन खेल स्थगित भएको प्रि–वल्र्डकपका संयोजक एवम् नाका उपाध्यक्ष सोवित बानियाँले जानकारी दिनुभयो । प्याराग्लाइडिङ प्रि–वल्र्ड कपमा सहभागी पाइलट तथा दर्शकहरु लगातार खेल स्थगित हुँदा निरास भएका छन् ।

शुक्रबार प्याराग्लाइडिङ खेलकोे प्रि–वल्र्डकपअन्तर्गत अभ्यास खेल सफलतापूर्वक भएको थियो । प्याराग्लाइडिङ गर्नका लागि निलो आकाश देखिने गरी खुलेको तथा घाम लागेको अवस्थामा उपयुक्त वातावरण भएको बानियाँले बताउनुभयो ।

प्रतिस्पर्धाका आधारमा छ दिनको खेल सञ्चालन हुने भए पनि यस प्रतियोगितामा न्यूनतम दुई दिनको टाक्स लिनुपर्ने भएकाले कम्तीमा पनि दुई दिन आकाश खुल्नैपर्ने नाका प्राविधिक उपाध्यक्ष रवीन गुरुङले जानकारी दिनुभयो ।

उहाँले ‘‘मौसमविद्हरुले भनेअनुसार आजसम्म मौसम खराब भए पनि मङ्गलबारदेखि मौसममा सुधार आउने भएकाले हामी आशावादी छौँ, हामीले न्यूनतम दुई दिनको टाक्स पूरा गर्न पाउने छौँ’’ भन्नुभयो ।

प्रतियोगितामा नेपालसहित ३६ राष्ट्रका १५० प्याराग्लाइडिङका पाइलट सहभागी भएका छन् । प्रतियोगिता यही फागुन २१ गतेसम्म सञ्चालन हुने भएको छ ।

पाइलटहरुले सराङकोटको १४ सय मिटरको उचाइबाट उडान भरी तोकिएको निर्धारित पोखरा क्षेत्रको आकाशमा पुगी क्रसकन्ट्री गरी फेवाताल नजिकको चारवटा ठाउँमा अवतरण गर्ने भएका हुन् ।

उक्त प्रि–वल्र्ड कपका लागि वल्र्डकप कमिटीबाट प्राविधिकले स्थलगत अवलोकनसमेत गर्दै गरेको आयोजकले जनाएको छ ।