मंगलबार, कार्तिक ११ २०७७
काठमाडौं ०९:४१
वासिङटन डिसी 23:56

योजनाबद्ध आक्रमण भयो: एमाओवादी

इनेप्लिज २०७१ फागुन १७ गते १४:५५ मा प्रकाशित

Prachanda-with-Ganga-narayan-in-hospitalकाठमाडौँ, १७ फागुन । सरकारले योजनावद्ध रुपमा आफ्ना नेता तथा कार्यकर्तामाथि आक्रमण गरेको एकीकृत नेकपा(माओवादी)ले आरोप लगाएको छ ।

शनिबार नयाँबानेश्वरमा निषेधित क्षेत्र तोडेको भन्दै प्रहरीले गरेको हस्तक्षेपमा एमाओवादीका नेता गङ्गानारायण श्रेष्ठलगायत तीसभन्दा बढी नेता तथा कार्यकर्ता घाइते भएका थिए ।

घाइतेहरुको कान्तिपुर, निजामती र वीर अस्पतालमा उपचार भइरहेको छ ।

एमाओवादी अध्यक्ष पुष्पकमल दाहालले आज कान्तिपुर अस्पतालमा पुगी नेता श्रेष्ठको स्वास्थ्य स्थितिका बारेमा जानकारी लिनुभएको थियो ।

नेता श्रेष्ठको स्वास्थ्य स्थितिको बारेमा जानकारी लिएपछि सञ्चारकर्मीसँग अध्यक्ष दाहालले सत्तारुढ दलको व्यवहार अझै पनि सहमतिका आधारमा अगाडि बढ्न तयार नभएको बताउनुभयो ।

बहुमतीय प्रक्रियालाई स्थगन गरेर सहमतिका आधारमा अगाडि बढ्न सत्ताधारी तयार नभए थप सशक्त आन्दोलनको आवश्यकता रहेकोमा जोड दिँदै उहाँले शनिबार बानेश्वरमा गरिएको प्रहरी हस्तक्षेप त्यसैको परिणति भएको बताउनुभयो ।

यसैबीच कान्तिपुर अस्पतालमा उपचाररत एमाओवादी नेता श्रेष्ठले रासससँग सङ्क्षिप्त कुरा गर्दै आफूलाई प्रहरीले चिनेर नै ताकी–ताकी प्रहार गरेको बताउनुभयो ।

प्रहरीका उच्च अधिकारीसँग छलफल गर्दै गर्दा एक्कासी हस्तक्षेप भएको र नेताहरुमाथि नै छानी–छानी प्रहार गरिएको उहाँको भनाइ छ ।

एमाओवादी प्रवक्ता दीनानाथ शर्माले प्रहरी हस्तक्षेमा परेर घाइते भएका नेता तथा कार्यकर्ताको निःशुल्क उपचार गर्न माग गर्नुभएको छ ।

“बिना कुनै आधार निषेधित क्षेत्र तोडेको आरोपमा नेता तथा कार्यकर्तामाथि जानी–जानी प्रहार गरिएको छ । त्यस क्षेत्रमा रहेका प्रहरीका अधिकृत तथा आक्रमणकारी प्रहरीलाई कारबाही हुनुपर्छ”–प्रवक्ता शर्माले भन्नुभयो ।

प्रतिक्रिया