एमाओवादीको संसदीय दलको कार्यालय सिंहदरबारमा आज बसेको ३० दलीय मोर्चाको बैठकले सत्तारुढ दलले वार्ताको कुरा गरे पनि नियत सफा नभएको भन्दै आन्दोलनको कार्यक्रम जारी राख्ने र संविधानसभाको बैठकमा सहभागी नहुने निर्णय गरेको हो ।

बैठकपछि सञ्चारकर्मीसँग कुरा गर्दै सद्भावना पार्टीका सहअध्यक्ष लक्ष्मणलाल कर्णले सत्तारुढ दलले वार्ताको कुरा गरे पनि सहमतिको कुनै तत्परता नदेखाएकाले बैठकमा सहभागी नहुने निर्णय गरिएको हो बताउनुभयो ।

संविधानसभाका अध्यक्ष सुवास नेम्वाङले यही चैत २३ गते दिउँसो १ बजेका लागि संविधानसभाको बैठक बोलाउनुभएको छ ।

मोर्चाले विगतमा घोषित आन्दोलनका कार्यक्रम जारी राख्ने र सकारात्मक वार्ताका लागि सत्तारुढ दल तयार भए सम्वादका लागिसमेत तयार रहेको निष्कर्ष निकालेको छ ।

बैठकमा एमाओवादी अध्यक्ष पुष्पकमल दाहालले प्रमुख दलका बीचमा पछिल्लो दिनमा भएका वार्ता र सम्वादको बारेमा जानकारी गराउनुभएको थियो ।

अध्यक्ष दाहालले सत्तारुढ दलले मुखले वार्ताको कुरा गरे पनि व्यवहारमा त्यस्तो नदेखिएको भन्दै आन्दोलनको विकल्प नभएको बताउनुभएको सहअध्यक्ष कर्णले जानकारी दिनुभयो ।

बैठकले आज मुलुकभर मोर्चाले शान्तिपूर्ण जनप्रदर्शन गरेको भए पनि सरकारले दमन गरेको निष्कर्ष निकालेको उहाँको भनाइ छ ।