शुक्रराज ट्रपिकल सरुवा रोग नियन्त्रण महाशाखाका अनुसार परीक्षणका लागि विभिन्न अस्पतालमा आउने रोगीको सङ्ख्या दैनिक १०० देखि १५० को सङ्ख्यामा रहे पनि गम्भीर प्रकृतिका रोगी भने छैनन् । हाल शुक्रराज ट्रपिकल अस्पतालमा भर्ना भई उपचार गरिरहेका पाँच रोगी मात्र छन् ।

रासससँग कुरा गर्दै अस्पतालका फ्लुरोग विशेषज्ञ डा शेरबहादुर पुनले स्वाइन फ्लुबाट प्रभावितको सङ्ख्या हाल स्थिर अवस्थामा रहेको र केही दिनपछि बिस्तारै घट्दै जाने विश्वास व्यक्त गर्नुभयो । बिरामीको सङ्ख्या विभिन्न अस्पतालमा विभाजित अवस्थामा रहेकाले रोगीको सङ्ख्या यति नै छ भनेर किटानी गरेर भन्न सक्ने अवस्थामा नरहेको उहाँको भनाइ थियो ।

रोगबाट बच्नका लागि सार्वजनिक यातायात तथा भिडभाड भएका ठाउँमा सकभर जान नहुने र त्यस्तो ठाउँमा गएर फर्केपछि साबुन पानीले हातमुख धुने, दिनभरि प्रयोग गरिएको ‘मास्क’ धुने तथा रोग सङ्क्रमणको सम्भावना अत्यधिक हुने हुनाले बच्चा र वृद्धवृद्धालाई सकभर भिडभाड भएको क्षेत्रमा जान नहुने उहाँको सुझाव छ ।

उहाँका अनुसार स्वाइन फलुको सङ्क्रमण देखिएसँगै मानिसमा मास्क लगाउनेको सङ्ख्या बढे पनि मास्क लगाउँदैमा शतप्रतिशत सुरक्षित हुन्छ भन्ने भ्रम पाल्न हुँदैन, तर मास्क लगाउँदा केही फाइदा भने हुन्छ ।

मौसम परिवर्तनका कारण रोगीको सङ्ख्या बढ्न सक्छ कि भनी सोधिएको प्रश्नको जवाफमा डा पुनले स्वाइन फ्लु भारतबाट आएको हुन सक्ने र रोगको सङ्क्रमण मौसम परिवर्तनकै कारण बढ्ने खतरा नभएको स्पष्ट गर्नुभयो ।