मापसे गरेर सवारी साधन चलाउँदा चालकको ज्यान नै जाने गरेको यथार्थलाई ध्यानमा राखी उपत्यका ट्राफिक प्रहरी महाशाखाले विसं २०६८ मङ्सिर १७ देखि मापसे जाँच गर्दै आएको थियो ।

आर्थिक वर्ष २०६८/६९ मा ३९ हजार ६६७, २०६९/७० मा ५२ हजार २८०, २०७०/७१ मा ५४ हजार ५३५ जना सवारी चालक मापसे कारबाहीमा परेकामा आव २०७१/७२ को फागुन मसान्त आइपुग्दा जम्मा २६ हजार ३६७ चालक मापसे कारबाहीमा परेका छन् ।

“अघिल्ला वर्षको तुलनामा यस वर्ष कम चालक मापसे कारबाहीमा परेका छन्,” ट्राफिक प्रहरी महाशाखाका प्रहरी नायब उपरीक्षक ज्ञानेन्द्र पाख्रिनले भन्नुभयो । उहाँले भन्नुभयो – “विगतभन्दा अहिले ट्राफिक व्यवस्था कडा भएको र मापसे कारबाहीमा परेपछि सवारी चालक अनुमतिपत्रमा प्वाल पर्ने डरले मापसेमा कमी आएको हो ।”

यस्तै सार्वजनिक सवारी साधनमा आरक्षण सिट कार्यान्वयनसम्बन्धी २०७१ पुस १ गतेदेखि चालेको कारबाहीमा तीन हजार सात सवारी साधन कारबाहीमा परेको र १४ हजार ८३० यात्रुलाई सम्झाइबुझाई गरी पठाएको पाख्रिनले जानकारी दिनुभयो ।

यस्तै ‘लेन’ अनुशासन पालना नगर्ने सवारी चालकमध्ये २६ हजार ४४१ जनालाई सचेत पारिनुका साथै २४ हजार ५७० चालकलाई कक्षामा सहभागी गराएर प्रशिक्षण दिइएको महाशाखाले जनाएको छ ।

अहिलेसम्म मापसे सेवन गरेका सवारी चालकमाथि गरिएको कारबाहीबाट रु १५ करोड ९७ लाख दुई हजार राजस्व सङ्कलन भएको छ ।