इनेप्लिज
२०७१ चैत ४ गते ६:०२ मा प्रकाशित
बलेवा (बागलुङ), ४ चैत । ‘नेपालमा नातावाद र कृपावादको संस्कार छ’ भन्ने कुरालाई जिल्ला शिक्षा कार्यालय बागलुङले तोडिदिएको छ ।
चैत ५ गतेदेखि सुरु हुने प्रवेशिका परीक्षा (एसएलसी)मा आफन्त परीक्षार्थी भएका व्यक्ति केन्द्राध्यक्ष हुन नपाउने व्यवस्था गरेर उक्त भनाइलाई तोडिदिएको हो ।
एसएलसी परीक्षा अमर्यादित भयो भनेर चौतर्फी आलोचना हुन थालेपछि उक्त आलोचना मेट्न आफन्त परीक्षार्थी नभएका केन्द्राध्यक्षको व्यवस्था गरेको जिल्ला शिक्षा अधिकारी विष्णुप्रसाद तिवारीले बताउनुभयो ।
जिल्लाका सात हजार ३३३ विद्यार्थीका लागि ३० केन्द्रमार्फत परीक्षा दिने व्यवस्था मिलाइएको छ । बागलुङबाट नियमिततर्फका पाँच हजार १२१ र ऐक्जाम्टेडतर्फका दुई हजार २१२ जना विद्यार्थी परीक्षामा सहभागी हुँदैछन् । “जिल्लाका ३० वटै परीक्षा केन्द्रमा कुनै पनि केन्द्राध्यक्षका आफन्त परीक्षामा सहभागी छैनन्,” तिवारीले भन्नुभयो, “यदि आफन्त भएको फेला परेमा अर्कै केन्द्राध्यक्षको व्यवस्था गरिने छ ।” यसबाट परीक्षाको मर्यादामा थप टेवा पुग्ने तिवारीको भनाइ छ ।
परीक्षालाई व्यवस्थित, मर्यादित, निष्पक्ष र भयरहित बनाउन सरोकारवालासँग अपिलसहित २२बुँदे आचारसंहिता पनि जारी गरेको तिवारीले बताउनुभयो ।
कार्यालयले जारी गरेको आचारसंहितामा विद्यार्थीले चिट चोर्न नपाउनेदेखि आफन्तले परीक्षा दिँदै गरेको केन्द्रमा केन्द्राध्यक्ष तथा निरीक्षक नै बस्न नपाउने व्यवस्था गरिएको छ ।
विगत वर्षदेखिन नै होमसेन्टर खारेज गरेको कार्यालयले यसपल्ट सदरमुकाममा चार र विभिन्न गाउँमा २६ गरी ३० परीक्षा केन्द्र कायम गरेको छ ।
परीक्षा सञ्चालनका लागि ३० जना केन्द्राध्यक्ष, ३२ जना सहायक केन्द्राध्यक्ष, २९५ निरीक्षक र ९६ जना सहयोगी कर्मचारी र ३०० सुरक्षाकर्मीको व्यवस्थापन गरेको कार्यालयले जनाएको छ ।
यस पटकको परीक्षामा जिल्लाको नारायणस्थानमा रहेको जनताधन उच्च माविबाट एक जना दृष्टिविहीन विद्यार्थीसमेत सहभागी बन्ने छन् । यस्तै जिल्लाका तीन विद्यालयमा प्राविधिक शिक्षा अध्ययन गर्ने ९४ जना विद्यार्थी परीक्षामा सहभागी बन्ने कार्यालयका अधिकृत लोकनाथ आचार्यले बताउनुभयो ।
कार्यालयले जिल्लाका सबै केन्द्रमा प्रश्नपत्र तथा उत्तरपुस्तिका पुगिसकेकोे जनाएको छ ।
प्रतिक्रिया