नेपाल पुलिस हेल्थ क्लबले बेग्लाबेग्लै सेवाग्राहीका लागि विभिन्न सहुलियतको व्यवस्थासमेत गरेर पौडी पोखरी सञ्चालनमा ल्याइएको यहाँ आज आयोजित पत्रकार सम्मेलनमा जानकारी दिइयो ।

जाडोयाम सकिएलगत्तै काठमाडौँ उपत्यकामा बढ्दै गएको गर्मी छल्न सेवास्वरुप सो पोखरी सञ्चालनमा ल्याइएको प्रहरी कल्याण कोषका वरिष्ठ उपरीक्षक लव विष्टले जानकारी दिनुभयो ।

करिब चारदेखि १० फिट गहिरो सो पोखरीमा दैनिक १०० देखि १५० जनाले सेवा लिने क्लबले जनाएको छ । बिदाको दिन भने करिब ५०० को हाराहारीमा सेवा लिने अनुमान गरिएको छ । पौडी खेल्न आउने सर्वसाधारणले दिनभरिका लागि रु ३०० तिनुपर्ने हुन्छ ।

त्यसैगरी सो पौडी पोखरीमा सेवा लिने प्रहरी कर्मचारी, निवृत्त प्रहरी र तिनका परिवारलाई ७५ प्रतिशत सहुलियत दिइएको छ । १० जनाको समूहमा आउने विद्यार्थीलाई रु ५० र सोही समूहमा आउने अन्यलाई २५ प्रतिशत सहुलियत दिइने छ ।

सरकारी कर्मचारीका लागि रु २५ र अपाङ्गता भएकाका लागि ३३ प्रतिशत सहुलियत दिइएको छ । त्यसैगरी ५० जनाभन्दा बढीको सङ्ख्यामा आउने विद्यार्थी समूहले प्रतिघन्टा रु ८० तिर्नुपर्ने छ ।

दुई तीन दिनदेखि बढ्दै गएको गर्मी छल्नका लागि पौडी खेल्न क्लबमा आउनुभएका सर्वसाधारण सुदीप सागरले अन्य पौडी पोखरीमा भन्दा क्लबले सञ्चालन गरेको पोखरीमा सबै सुविधा भएको हुँदा बर्सेनि आउने गरेको बताउनुभयो ।