शनिबार, कार्तिक १५ २०७७
काठमाडौं ०९:३३
वासिङटन डिसी 23:48

रियाल मड्रिड च्याम्पियन्स लिगको क्वार्टरफाइनलमा प्रवेश

इनेप्लिज २०७१ फागुन २७ गते ११:३० मा प्रकाशित

काठमाडौं, २७ फागुन । स्पेनिस क्लब रियाल मड्रिड र पोर्चुगलको एफसी पोर्टो यस सिजनको युरोपियन च्याम्पियन्स लिग फुटबल प्रतियोगिताको क्वार्टरफाइनलमा प्रवेश गरेका छन् ।

मंगलबार राति भएको प्रिक्वार्टरफाइनल दोस्रो लेगको खेलमा जर्मनीको शाल्कासँग ४–३ ले पराजित भएपनि पहिलो लेगमा २–० ले विजयी भएको रियाल मड्रिड समग्रमा ५–४ को जित निकाल्न सफल भयो ।

रियाल मड्रिडलाई उसकै मैदानमा हराउन शाल्काका क्लास यान हन्टेलारले दुई तथा क्रिश्चियन फुस र लिरोए सेनले एक–एक गोल गरे । रियाल मड्रिडका लागि क्रिश्चियानो रोनाल्डोले दुई तथा करिम बेन्जमाले एक गोल गरे ।

आफ्नै मैदानमा ४–३ ले पराजित भएपनि पहिलो लेगमा शाल्कामाथि उसैको मैदानमा हात पारेको २–० को जित रियाल मड्रिडलाई प्रतियोगिताको क्वार्टरफाइनलमा पु¥याउन पर्याप्त बन्यो ।

मंगलबार राति भएको अर्को खेलमा पोर्चुगलको एफसी पोर्टोले स्वीट्जरल्यान्डको एफसी बाजललाई ४–० ले हरायो । पहिलो लेगमा १–१ गोलको बराबरी खेलेको पोर्टोले समग्रमा खेल ५–१ ले आफ्नो पक्षमा पारेको हो ।

युरोपकै सबैभन्दा ठूलो क्लब फुटबल प्रतियोगिता युएफा च्याम्पियन्स लिग अन्तर्गत बुधबार राति दुई खेल हुनेछन् । इंग्ल्यान्डको चेल्सी र फ्रान्सको पीएसजी तथा जर्मनीको बायर्न म्युनिख र युक्रेनको शख्तर डोनेट्स्क भिड्ने छन् । तस्वीरः एजेन्सी

प्रतिक्रिया