अफगानिस्तानका तालिवानसँग अफगान सरकारले शान्ति वार्ताको प्रयास गरेको बताइएको छ । हाल त्यहाँ कायम रहेको विद्रोहको शान्तिपूर्ण समाधान खोज्नुपर्नेमा सरकार प्रतिबद्ध रहेको बताएको हो ।

अफगानिस्तानका कार्यकारी प्रमुख अब्दुल्लाहले अफगान मन्त्रीहरुलाई आगामी दिनमा त्यहाँ तालिवानसँग शान्ति वार्ता हुने जानकारी गराउनुभएको थियो ।

सो भनाईपछि पाकिस्तानले पनि सो वार्ताको स्वागत गरेको हो । पाकिस्तानको विदेशमन्त्रालयले बिहीबार भनेको छ– हामी अफगानिस्तान सरकार र त्यहाँका तालिवानहरुबीच हुने भनिएको शान्तिवार्ताको स्वागत गर्दछौँ ।

तर सो वार्ताको तालिवानहरुले भने कुनैपनि प्रतिक्रिया दिएका छैनन् । उनीहरुले सो वार्ता सरकारले गरेको हल्ला भएको बताएका छन् ।

उता पाकिस्तानी विदेशमन्त्रालयका प्रवक्ता तस्लिम अस्लामले मन्त्रालयको नियमित पत्रकार सम्मेलनका क्रममा बिहीबार पाकिस्तान सधैँ अफगानिस्तान समस्याको समाधानका लागि शान्तिपूर्ण वार्ताकै पक्षमा रहेको बताउनुभयो ।