काठमाडौं, १२ फागुन । नेपालबाट अन्तर्राष्ट्रिय उडान गर्न विश्व एयरवेज कम्पनीले रसियामा बनेको एयरक्राफ्ट खरिद गर्ने भएको छ ।

नेपालको स्टार्ट (अप एयरलाइन्स विश्व एयरवेजले रुसमा बनेका पाँचवटा सुखोइ सुपरजेट १०० एसएसजे(१००) खरिद गर्न बताइएको छ ।

आगामी सन् २०१७ मा भारतमा जारी एरो इण्डिया इन्टरनेसनल एरोस्पेस सोमा हस्तारन्तरण गर्ने गरि रुसी जहाज निर्माता कम्पनी सुखोइ सिभिल एयरक्राफ्ट र विश्व एयरवेजबीच जहाज खरिद सम्बन्धि आशयपत्रमा हस्तारक्षर गरेका छन् ।

विश्व एयरवेजको तर्फबाट अध्यक्ष आशिषमान श्रेष्ठ र सुखोइ सिभिल एयरक्राफ्टको तर्फबाट एन्ड्रिचनिकोभ इभ्ग्नेले आशय पत्रमा हस्ताक्षर गरेका छन् ।

विश्व एयरवेज गत जेठ २९ गते कम्पनी रजिष्ट्रारमा दर्ता भएको कम्पनी हो । विश्व एयरवेजले खरिद सम्झौता गरेको एयरक्राफ्ट ९३ सीट क्षमताको छ । यसमा दुई क्लास छुट्ट्याइएको छ ।
सन् २०१४ मा विश्व एयरवेजले एयरबस ए३२०–२०० सिरिजको दुइवटा जहाज खरिद सकिसकेको छ ।
दुइवटा जहाज मार्फत भारतसहित चीन, जापान, मलेसिया, साउदी अरेबियालगायत गन्तव्यमा उडान गर्ने योजना बनाएको एयरवेजले जनाएको छ ।
विश्वले माग बढ्दै गएपछि आन्तरिक तथा क्षेत्रीय उडान पनि गर्ने योजना बनाएको विश्व एयरवेजलाई उद्धृत गर्दै सुखोइले आफ्नो वेबसाइटमा उल्लेख गरेको छ ।

विश्व एयरवेज सिङ्गापुरमा बस्ने नेपालीहरूले लगानी गरेको विश्व होल्डिङ नामक कम्पनीको भगिनी कम्पनी हो ।

विश्व होल्डिङ्सको अध्यक्ष आशिषमान श्रेष्ठ हुन् ।

एयरक्राफ्ट सञ्चालनमा आएसँगै एयरवेजमार्फत यात्रु तथा कार्गो दुवै प्रकारका उडान हुनेछन् ।

यो जहाजले ४५ सय किलोमिटरसम्म निरन्तर उडान भर्न सक्छ ।

तर, मन्त्रालयमा हवाइ उड्डयन महाशाखाका उपसचिव प्रमोद नेपालका अनुसार अहिलेसम्म विश्व एयरवेजले औपचारिक रुपमा कुनै कागजात पशे गरेको छैन । उनले भने अहिलेसम्म कुनै कागजात आएको छैन ।

मन्त्रालयमा दर्ता भएर प्रक्रिया पुरा गरेपछि उडान सञ्चालन अनुमति (एओसी)का लागि नेपाल नागरिक उड्डयन प्राधिकरणमा आवेदन दिनुपर्छ ।

एओसीको लागि पाँत तहको प्रक्रिया पुरा गरेपछि प्राधिकरणले अनुमति दिनेछ ।