आज कीर्तिपुरस्थित क्रिकेट मैदानमा भएकोे फाइनल खेलमा टस जितेर ब्याटिङ गरेको जनकपुरले निर्धारित ४० ओभरमा सबै विकेट गुमाउँदै ९८ रनको झिनो लक्ष्य मात्र दिन सक्यो ।

जवाफी ब्याटिङमा आएको एपिएफलाई जित निकाल्न केवल २४.३ ओभर नै काफी रह्यो । उसले तीन विकेटकै क्षतिमा सजिलै लक्ष्य पूरा गर्‍यो ।

एपिएफलाई जित दिलाउनका लागि बलरको भूमिका विशेष रह्यो । प्लेयर अफ दि म्याच घोषित नीरा राजोपाध्यायले लिएको पाँच विकेटले जनकपुरको मनोबल गिरायो । त्यस्तै जनकपुरलाई सस्तैमा समेट्न रुविना क्षेत्रीले लिएको दुई, ऋतु कनोजिया, विनु बुढामगर, सीता रानामगरले एक/एक विकेटको योगदान दिए ।

यसअघि जनकपुरको ब्याटिङ लाइन पूरै असफल भएको थियो । जनकपुरकी अनुराधा चौधरीले २८, ममता चौधरीले २० र रोजी कदारीले १२ रन बनाउनबाहेक अन्य ब्याट्सम्यानले दोहोरो अङ्कको रन समेत बनाउन सकेनन् ।

थोरै लक्ष्य भएका कारण बिना दबाब ब्याटिङको जवाफ दिएका एपिएफका खेलाडीहरु ज्योति पाण्डेले अविजित ३१, सरिता मगरले १४, सीताले १०, अर्की अविजित नीराले सात तथा मधु थापाले छ रन जोड्दा सहज जित निस्कियो ।

ब्याटिङ प्रदर्शन खराब भएपछि दबाबमा खेलेका जनकपुरका बलरहरुले गरेको जितको प्रयास पनि निरर्थक रह्यो । उसका लागि अनुराधाले दुई र सन्तोषी चौधरीले एक–एक विकेट मात्र लिए पनि अन्यको प्रयास खेर गयो र हार टरेन ।

उपाधि विजेता एपिएफले रु ट्रफीसहित रु ५० हजार हात पार्‍यो भने जनकपुरले उपविजेताको ट्रफीमा सीमित भएर रु ३० हजारमा चित्त बुझाउनुप¥यो ।

प्रतियोगितामा सर्वोकृष्ट तथा उत्कृष्ट घोषित खेलाडीले ट्रफी तथा नगद पुरस्कार पाए । क्षेत्र नं ५ नेपालगन्जकी सन्जु चौधरीले सर्वोकृष्ट हुँदै रु १० हजार हात पार्नुभयो ।

त्यसैगरी उत्कृष्ट ब्याट्सम्यान क्षेत्र नं १ विराटनगरकी सङ्गीता राई र बलर उपविजेता जनकपुरकी शान्ति चौधरीले पाँच–पाँच हजार पारे भने उदयीमान खेलाडीको उपाधि पनि सङ्गीताले नै जित्नुभयो ।

राष्ट्रिय खेलकुद परिषद् (राखेप) का सदस्य सचिव युवराज लामा र नेपाल क्रिकेट सङ्घका कार्यबाहक अध्यक्ष दीपक कोइरालालगायतले ट्रफी तथा नगद पुरस्कार प्रदान गर्नु भएको थियो ।