विराटनगरको सहिद मैदानमा आयोजित खेलमा झापा–११ ले आज जगदम्बा लुम्बिनी फुटवल क्लबलाई २–१ले पराजित गरी फाइनलमा पुगेको हो ।

पहिलो मध्यान्तरसम्म अत्यन्त प्रतिस्पर्धात्मक खेलका कारण कुनै पक्षबाट गोल हुन सकेको थिएन । दोस्रो मध्यान्तरमा खेल सुरु भएको तीन मिनेटमै झापा–११ का विशाल राई ‘ए’ ले पहिलो गोल गरी आफ्नो टोलीलाई अग्रता दिलाए । दोस्रो मध्यान्तरको ३० औं मिनेटमा लुम्बिनी फुटवल क्लबका विश्वास श्रेष्ठले एक गोल गरी खेललाई बराबरीमा ल्याएका थिए ।

निर्धारित समयमा खेल बराबरी भएपछि थपिएको अतिरिक्त समयको १६औं मिनेटमा झापा–११ का विशाल राई ‘ए’ ले पुनः अर्को गोल गरी झापा– ११ लाई फाइनलमा पुर्‍याएका हुन् ।

जगदम्बा–लुम्बिनी फुटबल क्लबले पराजित भएपनि रु एक लाखको पुरस्कार प्राप्त गरेको छ । पहिलो पटक विराट गोल्डकपमा पहिलो चरणमा हार्नेलाई रु ३० हजार र दोस्रो चरणमा हार्नेलाई एक लाख पुरस्कारको व्यवस्था गरिएको छ ।