विभिन्न पत्रपत्रिका तथा सञ्चारमाध्यममा आएको समाचारजस्तो तत्काल पार्टी एकता भने हुननसक्ने उहाँको भनाइ छ । ‘भक्तबहादुर श्रेष्ठ विविध आयाम’ नामक स्मृतिग्रन्थ र ‘माओवादी आन्दोलन गति र दिशा’ नामक पुस्तकको यहाँ आज विमोचन गर्दै उहाँले नेकपा–माओवादीले एमाओवादीसँग मात्र होइन् माक्र्सवाद, लेनिनवाद, माओवाद तथा नयाँ जनवाद् मान्ने र विगतका कमजोरी सच्याउँदै संसदीय जनवादको विरोध गरी जनवादी केन्द्रीयतालाई मान्ने जो कोही पार्टीसँग पनि पार्टी एकता हुनसक्छ भन्नुभयो ।

नेपालका कम्युनिस्ट पार्टीहरु विभाजित भएको अवस्थामा अन्य शक्ति बलियो हुँदै गएको भन्दै उहाँले एनेकपा—माओवादी र नेकपा–माओवादी मात्रैभन्दा पनि सच्चा क्रान्तिकारी कम्युनिस्टबीच एकताको आवश्यकता छ भन्नुभयो । उहाँले पार्टीबाट विभाजित भएर गएको नेत्रविक्रम चन्द नेतृत्वको पार्टीलाई पुनः आफ्नै पार्टीमा फर्कनसमेत आग्रह गर्नुभयो । वर्तमान संविधानसभाले संविधान जारी गर्न नसक्ने हुँदा त्यसलाई विघटन गरी सर्वपक्षीय, सर्वदलीय सम्मेलनको आयोजना गर्नुपर्ने उहाँको भनाइ थियो ।

पार्टीका उपाध्यक्ष सिपी गजुरेलले क्रान्तिलाई प्रतिक्रान्तिमा बदल्ने प्रयास भइरहेको अवस्थामा कम्युनिस्टबीच एकता हुनुपर्नेमा जोड दिनुभयो । भक्तबहादुर स्मृति प्रतिष्ठानले प्रकाशन गरेको ‘माओवादी आन्दोलन, गति र दिशा’ नामक पुस्तकमा माक्र्सवाद, कम्युनिस्ट आन्दोलन र माओवादी आन्दोलन, एनेकपा (माओवादी) र नेकपा–माओवादीका बारेमा विश्लेषणात्मक सात लेख समावेश गरिएका छन् ।

त्यसैगरी, ‘भक्तबहादुर श्रेष्ठ विविध आयाम’मा कम्युनिस्ट आन्दोलनका हस्ती भक्तबहादुर श्रेष्ठको जीवन र व्यक्तित्वबारे १२ लेख समावेश गरिएका छन् । प्रा डा सुरेन्द्र केसी र प्रा रमेश शर्माले नेपालका कम्युनिस्ट दल र दलका नेताहरु रुपान्तरित हुनुपर्नेमा जोड दिनुभयो ।