इनेप्लिज
२०७१ माघ २१ गते ९:३३ मा प्रकाशित
भक्तपुर, २१ माघ । उद्योग मन्त्री महेश बस्नेतले नेपालको शिक्षा नीतिमा व्यापक परिवर्तनको खाँचो रहेको बताउनुभएको छ ।
भक्तपुरको गठ्ठाघरस्थित आस्था महिला विद्यालयको साधारणसभा एवम् सीप विकास तालिमको आज उद्घाटन गर्दै उहाँले नेपालको शिक्षा नीतिमा व्यापक परिवर्तन नभएसम्म बेरोजगारी समस्या समाधान नहुने बताउनुभयो ।
नेपालको शिक्षा गरिखाने शिक्षा नभएको बताउँदै उहाँले व्यावहारिक र सीपयुक्त शिक्षाले मात्र देशको बेरोजगारी समस्या हल गर्ने बताउनुभयो ।
अन्तर्राष्ट्रिय क्षेत्रमै प्रतिस्पर्धा गर्न सक्ने शिक्षा नीति अबलम्बन गर्नसके स्वदेशमै आफ्नो सीप बेचेर बाँच्न सक्ने बताउँदै मन्त्री बस्नेतले यस्तो शिक्षा भए विदेशमा जाने नेपालीले पनि जोखिम मोल्ने काम नभई सीपअनुसारको काम पाउन सक्ने बताउनुभयो ।
आजदेखि सुरु हुने तालिममा एकल, दलित, अपाङ्गता भएका व्यक्ति तथा जनजाति महिलालाई एक महिने हातेव्याग बुन्ने तालिम सञ्चालन गरिएको छ ।
प्रतिक्रिया