एक करोड भन्दा बढी मूल्यको सुपारी बरामद

बनियानी (झापा), २० माघ । झापा प्रहरीले सुपारी तस्करी नियन्त्रणलाई प्रमुख प्राथमिकतामा राखेका छन् ।

आव २०७१/७२ को छ महिना अवधिमा प्रहरीले रु एक करोड २० लाख ५४ हजार मूल्यबराबरको ६० हजार २७० केजी सुपारी बरामद गरीे भन्सार कार्यालयमा बुझाएको छ ।

आव २०७०/७१ मा एक लाख ८९ हजार ८९४ केजी सुख्खा सुपारी बरामद गरी मेची भन्सार कार्यालयमा बुझाइएको थियो । बरामद सुपारीको मूल्य रु एक करोड ६९ लाख ६० हजार हुन्छ ।

सुपारी नियन्त्रणमा प्रहरी सक्रियताले झापामा तेस्रो मुलुकबाट आयातित सुपारीको परिमाण घटेको छ ।

गत वर्ष सुपारी तस्करीमा प्रयोग गरिने रिक्सा २२२ थान र ३५ वटा साइकल वटा भन्सार कार्यालयमा बुझाइएको थियो । यो वर्ष १६१ थान रिक्सा र ५० वटा साइकल बुझाइएको छ ।

अवैध रुपमा निकासी हुने सुपारी नियन्त्रण गर्ने क्रममा प्रहरीमाथि आक्रमणसमेत भएका छन् । गत वर्ष छ महिनामा प्रहरीमाथि १० वटा आक्रमण भएकामा १६ जना पक्राउ परेका थिए । यस वर्ष सुपारी नियन्त्रणमा प्रहरीले छवटा झडपका घटनामा १२ जना पक्राउ गरेर मुद्दा प्रक्रिया अघि बढाएको छ ।

गत वर्ष सुपारी तस्करी नियन्त्रणमा लापर्बाही गर्ने १८ प्रहरीलाई सजाय र छजनालाई पुरस्कृत गरिएको थियो । चालु आवको छ महिना अवधिमा विभिन्न दर्जाका १३ जना प्रहरीलाई सजाय र २० जनालाई पुरस्कार दिइएको जिल्ला प्रहरी कार्यालय झापाले जनाएको छ ।