कर्णालीका विद्यार्थीले समयमा पाठ्यपुस्तक पाउने

बाँके (खजुरा), १८ माघ । कर्णालीका प्राथमिक तहका विद्यार्थीले यस वर्ष समयमा नै पाठ्यपुस्तक पाउने भएका छन् ।

आगामी फागुन १ गतेदेखि नै कर्णालीका पाँचै जिल्लामा नयाँ शैक्षिकसत्र सुरु हुने भएकाले शनिबार आवश्यक पाठ्यपुस्तक पठाइएको हो । कर्णालीका कालीकोट, हुम्ला, जुम्ला, मुुगु र डोल्पाका पुस्तक व्यवसायीलाई शिक्षा मन्त्रालयले नेपालगन्जमा पुस्तक उपलब्ध गराएको हो ।  त्यहाँका विद्यार्थीका लागि ८३ हजार थान पुस्तक पठाइएको छ । पाठ्यपुस्तकको अभाव पूरा गर्न सरकारले निजी क्षेत्रलाई पनि जिम्मा दिएपछि अब पाठ्यपुस्तकको अभाव नहुने मन्त्रालयका सहसचिव मुकुन्द निरौलाले जिकिर गर्नुभयो ।

उहाँले निजी क्षेत्रसँग सहकार्य गरेर पुस्तक प्रकाशन र वितरण देशभर नै सुरु भएकाले अब समस्या झेल्नुनपर्ने प्रस्ट पार्नुभयो । सरकारले देशभर कक्षा १ देखि ५ सम्मका पाठ्यपुस्तक प्रकाशन र वितरणको जिम्मा निजी क्षेत्रलाई दिएको छ ।

जिल्ला शिक्षा अधिकारी देवेन्द्रराज खनालले पाठ्यपुस्तकको अभाव टार्न सरकारले थालेको प्रयासले पाठ्यपुस्तक वितरणमा पनि सहजता हुने विश्वास व्यक्त गर्नुभयो ।