आन्दोलनको धम्कीबाट डराईन्न:खनाल

विराटनगर, १८ पुस । नेकपा एमालेका वरिष्ठ नेता झलनाथ खनालले एमाओवादी मोर्चाको बन्द हड्तालको धम्कीले एमाले नतर्सिने बताएका छन् ।

विराटनगर विमानस्थलमा शुक्रबार पत्रकारसँग कुरा गर्दै खनालले आफूहरु बितन्डा मच्चाउने पक्षमा नरहेको भन्दै बन्द हड्तालको धम्की छाडेर सहमतिमा आउन एमाओवादी लगायत विपक्षी दलहरुलाई आग्रह समेत गरे । खनालले ८ माघ मै नयाँ संविधान जारी गर्ने दाबी गरेका छन् ।

बन्द, हड्ताल र १० वर्षको द्वन्द्व मुलुकले झेलिसकेकाले अब त्यस्ता गतिविधिबाट कोही पनि नतर्सन्ने भने । उनले संविधान तयारी अवस्थामा रहेको र केही विषयमा रहेका मतभिन्नतालाई सहमतिबाट समाधान खोजिने स्पष्ट पारे । सहमति नभए प्रक्रियामा लगेर माघ ८ गते नै संविधान जारी गर्ने खनालले बताए ।

संविधान निर्माण हुनुअगावै वा संविधान जारी भएपछि सरकार परिवर्तन हुने संभावनाबारे पत्रकारले राखेको जिज्ञासामा उनले यतिखेर सिङ्गो राष्ट्रको ध्यान संविधान निर्माणतर्फ मात्र केन्द्रित रहेको भन्दै अझै त्यतातिर नसोचेको जवाफ दिए ।