पाकिस्तानमा मस्जिदमाथि आक्रमणमा कम्तीमा चालीसको मृत्यु

सिकारपुर (पाकिस्तान), १६ माघ । पाकिस्तानको दक्षिणी भागमा एक व्यस्त सिया मस्जिदमा भएको बम आक्रमणमा कम्तीमा ४० व्यक्तिको मृत्यु भएको जानकारी अधिकारीहरूले दिएका छन् । यो पाकिस्तानमा गत दुई वर्षमा भएको सबैभन्दा घातक जातीय आक्रमण भएको बताइएको छ ।

उक्त आक्रमण सिन्ध प्रान्तको सिकारपुरमा अवस्थित मस्जिदमा भएको बताइएको छ । यो स्थान कराचीबाट करिब ४७० किलोमिटर उत्तरमा अवस्थित छ । उक्त मस्जिदमा शुक्रबारको प्रार्थनामा सयौँ व्यक्ति भेला भएका थिए ।

सिन्धका स्वास्थ्यमन्त्री जाम मेहताव दाहेरले जम्मा ४० व्यक्तिको मृत्यु भएको तथा ४६ अन्य घाइते भएको जानकारी दिनुभयो ।

सिकारपुरको नागरिक अस्पतालका स्वास्थ्य सुपरिन्टेन्डेन्ट सौकत अली मेहमोनले मृत्युको सङ्ख्या पुष्टि गर्नुभयो । उहाँले धेरै घाइतको अवस्था गम्भीर भएकाले मृतकको सङ्ख्या बढ्नसक्ने बताउनुभयो ।