आयोजक माइभ्यालीलाई झापा—११ ले हरायो

इलाम, १६ माघ । इलाम सदरमुकाममा जारी अन्तर्राष्ट्रिय आमन्त्रण टुबोर्ग माइभ्याली गोल्डकप फुटबल प्रतियोगिताको आजको खेलमा झापा ११ दुई शून्यको अन्तरले विजयी भएको छ ।

आयोजक माइभ्याली फुटबल क्लबलाई शून्यका विरुद्ध २ गोल गर्दै झापा विजयी भएको हो । खेल सुरु भएको १६ मिनेटमा झापाका तर्फबाट जर्सी नम्बर १२ का दिनेश कार्कीले पहिलो गोल गर्दै गोलको खाता खोलेका थिए ।

यस्तै  १८औँ  मिनेटमा इलामका रक्षापङ्क्तिका खेलाडी सचिन्द्र धिमालले आत्मघाती गोल गर्दा झापा ११ ले अग्रता दोब्बर बनाएको थियो । खेलमा गोल गर्ने थुप्रै अवसर पाए पनि आयोजकले गोलमा परिणत गर्न सकेन ।

इलामका कप्तान राजु थापाले पहेंलो कार्ड पाएका थिए । आजको म्यान अफ द म्याच झापाका दिनेश कार्की घोषित भए । भोलिको खेल नेपाल पुलिस क्बल र बङ्गलादेशबीच हुनेछ ।

बिहीबारदेखि सुरु भएको प्रतियोगितामा मोरङ ११ लाई नेपाल पुलिसले १ गोलले जितेको थियो ।  रु तीन लाख राशिको प्रतियोगितामा भुटान, भारत, बङ्गलादेश, त्रिभुवन आर्मी, नेपाल पुलिस, थ्रीस्टारलगायतका १० टिम सहभागी छन् ।