शुक्रबार, मंसिर १२ २०७७
काठमाडौं ०९:०५
वासिङटन डिसी 22:20

राष्ट्रपति डा यादव र अध्यक्ष गच्छदारबीच भेटवार्ता

इनेप्लिज २०७१ माघ १६ गते १६:२० मा प्रकाशित

Rambaran-yadav-and-Bijay-gaकाठमाडौँ, १६ माघ । राष्ट्रपति डा रामवरण यादव र मधेसी जनअधिकार फोरम नेपाल लोकतान्त्रिकका अध्यक्ष विजय गच्छदारबीच भेटवार्ता भएको छ ।

राष्ट्रपति भवन शीतल निवासमा आज भएको भेटवार्तामा सहमतिका आधारमा नै संविधान लेखन प्रक्रियालाई तार्किक निष्कर्षमा पुर्‍याउनुपर्नेमा राष्ट्रपतिले जोड दिनुभएको थियो ।

मुलुकलाई द्वन्द्वमा लैजाने भन्दा पनि सहमतिका आधारमा जनआन्दोलनकारी शक्तिकोबीच विश्वासको वातावरण बनाउनुपर्ने, वार्ता र सम्वादका आधारमा विवादित विषयलाई टुङ्गोमा पु¥याउन प्रमुख राजनीतिक शक्तिले अधिकतम् प्रयत्न गर्नुपर्नेमा राष्ट्रपति डा यादवले ध्यानाकर्षण गराउनुभएको फोरम लोकतान्त्रिकका कार्यालय सचिव परमानन्द मेहताले जानकारी दिनुभयो ।

सो अवसरमा अध्यक्ष गच्छदारले सहमतिका आधारमा संविधान जारी गर्नका लागि सरकारमा रहेका दलको भूमिका महत्वपूर्ण र सन्तुलित हुनुपर्ने भएपनि जवरजस्ती गर्नेतर्फ केन्द्रित भएका कारण समस्या पैदा भएको जानकारी गराउनुभएको थियो ।

सहमतिका आधारमा नै संविधान जारी गर्न जोड
यसैबीच मधेसी जनअधिकार फोरम नेपाल लोकतान्त्रिकको आज सम्पन्न केन्द्रिय समितिको बैठकले सहमतिको आधारमा नै संविधान जारी गर्नुपर्ने निष्कर्ष निकालेको छ ।

सो पार्टीका महासचिव जितेन्द्रनारायण देवकाअनुसार विगतमा दलहरुबीच भएको सहमति तथा सम्झौताका आधारमा सबैले अपनत्व गर्ने खालको संविधान जारी हुनुपर्ने निष्कर्ष निकाल्दै जवरजस्ती गर्ने सत्ताधारी दलको व्यवहार गलत भएको ठहर गरेको छ ।

मुलुकमा द्वन्द्व र मुठभेड बढाउने भन्दा पनि सहमति र सहकार्यका आधारमा नै अगाडि बढ्न सबै राजनीतिक दललाई आग्रह गर्ने र सोहीअनुसारको गतिविधि सञ्चालन गर्न सचेत गराउने निर्णय गरेको महासचिव देवले बताउनुभयो ।

प्रतिक्रिया