होटल डिभोटी एसपिए कप २०१५ को तयारी पूरा

धनगढी, १५ माघ । माघ १६ गतेबाट यहाँ आयोजना हुने देशकै सर्वाधिक पुरस्कार राशिको क्रिकेट प्रतियोगिता ‘होटल डिभोटी एसपिए कप २०१५’ को तयारी पूरा भएको छ ।

आयोजक सुदूरपश्चिमाञ्चल एकेडेमी (एसपिए)ले बुधबार आयोजना गरेको पत्रकार सम्मेलनमा प्रतियोगिताका संयोजक सुवास  शाहीले प्रतियोगिताको आवश्यक सम्पूर्ण तयारी पूरा भएको जानकारी दिनुभयो ।

प्रतियोगिताको आयोजनास्थल सेती अञ्चल प्रहरी कार्यालय धनगढीको मैदानलाई झकिझकाउ पारिएको छ । प्रतियोगिताका लागि सहभागी हुने टोलीका खेलाडी, प्राविधिक टोली धनगढी आउने क्रम सुरु भएको छ ।

देशभरिबाट विभिन्न १६ क्रिकेट टोलीको सहभागिता रहने आयोजकले जनाएको छ । प्रतियोगितामा विजेता टोलीले एसपिए कपसहित रु पाँच लाख तथा उपविजेताले रु दुई लाख पुरस्कार पाउने बताइएको छ ।