मंगलबार, मंसिर १६ २०७७
काठमाडौं ०८:२७
वासिङटन डिसी 21:42

गोरखाबाट १५ मेट्रिक टन अलैँची निर्यात

इनेप्लिज २०७१ माघ १३ गते १०:३९ मा प्रकाशित

3512102-300x210गोरखा, १३ माघ । यस जिल्लामा उत्पादन भएको अलैँचीमध्ये १५ मेट्रिक टन जिल्ला बाहिर निर्यात भएको छ ।

पच्चीस मेट्रिक टन अलैँची उत्पादन भएकामा यहाँबाट अहिलेसम्म १५ मेट्रिक टन निर्यात भइसकेको जिल्ला कृषि विकास कार्यालयले जनाएको छ ।

“किसानले प्रतिकेजी रु दुई हजार ६०० देखि रु तीन हजारसम्ममा अलैँची बेचे,” जिल्ला कृषि विकास कार्यालयका बागवानी विकास अधिकृत विष्णुकुमार श्रेष्ठले भन्नुभयो – “फल्नेबित्तिकै अलैँची बेचेका किसानले पनि प्रतिकेजी रु दुई हजार घटाएर बेचेका छैनन् ।”

व्यापारीले किसानको घरैमा पुगेर अलैँची किनेको जानकारी दिँदै उहाँले गोरखाको अलैँची झापा निर्यात हुँदै आएको बताउनुभयो ।

कार्यालयका अनुसार यस वर्ष अलैँचीको उत्पादन बढेको छ । रोग किराको सङ्क्रमण नभएको र फूल फुल्ने बेलामा वर्षा भएकाले अलैँचीको उत्पादन गत वर्षभन्दा बढेको अधिकृत श्रेष्ठले बताउनुभयो ।

जिल्लाको हंशपुर, खरिबोट, थालाजुङलगायत गाविसलाई कार्यालयले अलैँची उत्पादनको पकेट क्षेत्र मान्दै आएको छ । त्यस क्षेत्रका किसानले खेर गएको भिरालो जमिन, खेतबारीमा अन्य खेती मासेर अलैँचीको व्यावसायिक खेती गर्दै आएका छन् ।

“पन्ध्र मेट्रिक टन अलैँची निर्यातपछि जिल्लामा रु तीन करोड ९० लाख आम्दानी भित्रियो,” श्रेष्ठले भन्नुभयो, “अझै १० मेट्रिक टन अलैँची निर्यात हुन बाँकी छ ।”

गत वर्षको तुलनामा यस वर्ष अलैँचीको उत्पादन बढेको थालाजुङका किसान धनबहादुर गुरुङले जानकारी दिनुभयो । उहाँ भन्नुहुन्छ, “दाना धेरै फल्यो । उत्पादन बढ्यो । आम्दानी धेरै पाएँ ।” गत वर्ष रु ७० हजारको अलैँची बेचेका गुरुङले यस वर्ष रु एक लाख ८० हजारको अलैँची बेचेको बताउनुभयो ।

जिल्लाको करिब एक हेक्टर क्षेत्रफलमा अलैँचीको व्यावसायिक खेती हुँदै आएको छ । राम शाह, डम्मर शाही, जिर्मले, साउने जातका अलैँची खेती हुँदै आएको गोरखामा अलैँची खेती विस्तारका लागि किसानसँग मिलेर कार्यालयले नर्सरी स्थापना गरेको छ ।

थालाजुङको दुई ठाउँ, हंशपुर, माछाखोला र घ्यालचोकमा अलैँचीको बिरुवा तयार गर्ने नर्सरी तयार गरेको कार्यालयका प्रमुख वरिष्ठ कृषि विकास अधिकृत तीर्थकुमार श्रेष्ठले जानकारी दिनुभयो ।

प्रतिक्रिया