शनिबार, कार्तिक ८ २०७७
काठमाडौं ११:२१
वासिङटन डिसी 01:36

दोदा नदीमा पुल नहुँदा आवतजावतमा समस्या

इनेप्लिज २०७१ माघ १३ गते ३:१५ मा प्रकाशित

pul-nahudaबेलौरी (कञ्चनपुर), १३ माघ । जिल्लाको दक्षिणी भेग बेलौरी नगरपालिका–७ भकुण्डामा पक्की पुल नहुँदा आवतजावतमा समस्या परेको छ ।

बेलौरी–बाइसेविचुवा जोड्ने सडकखण्डअन्तर्गत दोदा नदीमा पक्की पुल नहुँदा उक्त क्षेत्रका स्थानीयवासीलाई आवतजावतमा समस्या परेको हो । बेलौरी बजारदेखि उत्तरी क्षेत्र पाँच किलोमिटर टाढा रहेको उक्त नदीमा पक्की पुल नभएका कारण सो क्षेत्रका विद्यार्थीसमेत मर्कामा परेका छन् ।

शङ्करपुर, बाइसेविचुवाबाट बेलौरीका विद्यालय तथा क्याम्पस पढ्न आउने विद्यार्थीसमेत मर्कामा परेका छन् । नदीकै कारण उनीहरुले बीचमै विद्यालय छोड्नु परेको बाध्यता पनि छ । बाइसेविचुवाबाट महाकाली बहुमुखी क्याम्पस बेलौरीमा अध्ययनरत करन रानाले नदीमा पुलै नभएका कारण पढाइमा समेत प्रभाव परेको बताए । उनले भने–“बर्सातका बेला नदी तर्न सकिँदैन, हिउँदमा मात्रै क्याम्पस आउने गरेको छुँ ।”

बर्सातका समयमा नदीको सतह बढ्दै गएपछि आवतजावतसमेत ठप्प हुने गरेको स्थानीयवासीको भनाइ छ ।
उक्त दुई गाविसका स्थानीयवासीलाई बेलौरी बजारलगायत भारतीय खजुरिया बजारमा दैनिक उपभोग्य कृषि सामान खरिदका लागिसमेत आउने गर्दछन् । तर पुल नभएका कारण सो क्षेत्रका स्थानीयवासी समस्यामा परेका छन् । गाउँमा बिरामी पर्दा उपचारका लागिसमेत निकै समस्या पर्ने गरेको शङ्करपुरका स्थानीयवासी पदम रानाको भनाइ छ । “घरमा बिरामी भएपछि मर्नुको विकल्प छैन”–उनले भने ।

उक्त क्षेत्रका स्थानीयवासीले भकुण्डामा पक्की पुल निर्माण गर्नसमेत माग गरेका छन् ।  बजेट नभएका कारण उक्त स्थानमा पक्की पुल निर्माण गर्न नसकिएको बेलौरी नगरपालिकाका कार्यकारी अधिकृत महेशबहादुर बमले बताउनुभयो ।

प्रतिक्रिया