अख्तियारकै अधिकृत घुससहित पक्राउ

धनकुटा, १० माघ । अख्तियार दुरुपयोग अनुसन्धान आयोग पूर्वाञ्चल क्षेत्रीय कार्यालय धनकुटाका शाखा अधिकृत खिमानन्द ज्ञवाली घुस लिँदालिँदै आज रङ्गेहात पक्राउ परेका छन् ।

अख्तियारमा परेको मुद्दा मिलाइदिन्छु भन्दै रु एक लाख ५० हजार घुस लिँदै गर्दा शाखा अधिकृत ज्ञवालीलाई अख्तियारको केन्द्रबाट खटिएको टोलीले रङ्गेहात पक्राउ गरेको हो ।

अख्तियारमा परेको जग्गा सिफारिससम्बन्धी मुद्दा मिलाइन्छु भन्दै ताङ्खुवागा बिसका पूर्व गाविस सचिव भक्तबहादुर भट्टराईबाट धनकुटा नगरपालिका–६ स्थित आफ्नै आवास गृहमा उनले घुस लिएका थिए ।

घुस मागेको जानकारी पाएर तीन दिन अघिदेखि खटिएको अख्तियारका प्रहरी निरीक्षक पुण्यराज मल्ल नेतृत्वको केन्द्रीय टोलीले ज्ञवालीलाई रङ्गेहात पक्राउ गर्न सफल भएको हो ।

अख्तियारलाई बदनाम गर्न योजनाबद्ध रुपमा आफूलाई फसाइएको निज ज्ञवालीले प्रतिक्रिया दिएका छन् ।