हाम्रो लचकतालाई कमजोरी ठानियो: अध्यक्ष दाहाल

काठमाडौँ, ७ माघ । एकीकृत नेकपा माओवादीका अध्यक्ष पुष्पकमल दाहालले आफूहरुको लचकतालाई सत्तापक्षले कमजोरी ठान्दा संविधानसभामा तोडफोड हुन पुगेको आरोप लगाउनु भएको छ ।
सोमबार राति संविधानसभामा भएको तोडफोडपछि आफ्नो पार्टीको धारणा सार्वजनिक गर्न आज यहाँ आयोजित पत्रकार सम्मेलनमा अध्यक्ष दाहालले विवादित विषयमा सहमति भइरहेको र थप दुई दिनको समय मागेका बेला नेपाली काँग्रेस र नेकपा एमालेले पेल्न खोज्दा द्वन्द्वको अवस्था सिर्जना भएको बताउनुभयो ।
सहमतिका लागि आफूले जोखिम मोलेर गाँठो फुकाउन शासकीय स्वरुपलाई एक/दुई दिन थाती राखेर अघि बढ्न सुझाव दिइरहेका बेला सहमति विपरीत उहाँहरु (काँग्रेस र एमाले)ले मस्यौदा समितिमा लैजाने भनेपछि सहमतिको वातावरण बिग्रिएको अध्यक्ष दाहालको कथन थियो ।
अध्यक्ष दाहालले भन्नुभयो–“हामी संविधानसभामा संविधान निर्माण प्रक्रियालाई रोक्ने र नाराबाजी गर्ने योजनामा मात्र थियौँ तर काँग्रेसका प्रमुख सचेतक चीनकाजी श्रेष्ठ प्रश्नावली समिति बनाउने प्रस्तावका साथ जबर्जस्ती रोस्टममा गएपछि झडप उत्पन्न भयो ।”
तोडफोड त संविधानसभा बैठक स्थगित भएपछि भएको देखिन्छ नि भन्ने सञ्चारकर्मीको जिज्ञासामा अध्यक्ष दाहालले भन्नुभयोे–“केही त्यस्तो भयो, गल्ती भयो भन्ने हामीलाई पनि लागेको छ ।” आवेश र आक्रोशको वातावरण बनेपछि अनियन्त्रित भएको उहाँको धारणा थियो ।
जनआन्दोलन, अन्तरिम संविधान तथा विभिन्न आदिवासी/जनजाति, मधेसी आन्दोलनको भावनाअनुसार नै सहमतिका आधारमा संविधान बन्नुपर्छ भन्ने आफूहरुले माग विपरीत सत्तापक्षले सङ्ख्याका आधारमा जबर्जस्ती प्रक्रिया अघि बढाउन खोजेका कारण संविधानसभामा झडप भएको अध्यक्ष दाहालले दोहोर्‍याउनुभयो ।
विगतको संविधानसभामा आफूहरुसँग दुई तिहाईको बहुमत भए पनि अन्तिम समयसम्म सहमतिका लागि प्रयास गरेको प्रसङ्ग उल्लेख गर्दै अध्यक्ष दाहालले संविधान निर्माणका लागि विगतको १२ बुँदे समझदारीका सहयात्रीबीच संविधानसभामा बहुमत र अल्पमत हुन नहुनेमा जोड दिनुभयो ।