सरकार परिवर्तनको कुनै प्रयास भएको छैनः मन्त्री बस्नेत

भक्तपुर, ७ माघ । उद्योग मन्त्री महेश बस्नेतले संविधान बनाउने अभियानमा दलहरु लागिरहेकाले सरकार परिवर्तनको कुनै प्रयास नभएको बताउनुभएको छ ।

भक्तपुर औद्योगिक क्षेत्रको आज अनुगमन गर्दै उहाँले संविधान निर्माण भएपछि मात्रै पूर्व सहमतिअनुसार राष्ट्रिय सरकार गठन हुनेछ भन्नुभयो ।

उहाँले भन्नुभयो, “सरकार परिवर्तन ठूलो कुरा होइन, सरकारभन्दा ठूलो संविधान हो, त्यसैले माघ ८ मा नभए केही दिन ढिलै भएपनि जनतालाई अब संविधान दिनैपर्छ ।”

भर्खरै मात्र उत्साह थपिएको उद्योग व्यवसायमा तातोपानी खन्याएर धरासायी बनाउने काम फेरि सुरु भएको बन्द हडतालले गरेको टिप्पणीसमेत उहाँले गर्नुभयो ।

सो अवसरमा उद्योग मन्त्रालयका सचिव उत्तमकुमार भट्टराई, औद्योगिक क्षेत्र व्यवस्थापन लिमिटेडका महाप्रबन्धक राजेन्द्र थापालगायतले उद्योगको विकासका लागि देशमा शान्ति र संविधान अपरिहार्य रहेको औँल्याउनुभएको थियो ।