प्रक्रियामा गएर भए पनि संविधान जारी गर्नुपर्छः उपाध्यक्ष भण्डारी

काठमाडौँं, ७ माघ । नेकपा एमालेका उपाध्यक्ष विद्यादेवी भण्डारीले सहमति हुन नसके प्रक्रियामा गएर भए पनि संविधान जारी गर्नुपर्ने बताउनुभएको छ ।

संयुक्त महिला सङ्घ सङ्घर्ष समितिले आज यहाँ आयोजना गरेको पत्रकार सम्मेलनमा उहाँले मुलुकलाई अनिर्णयको बन्दी बनाएर नराखी प्रक्रियामा गएर निर्धारित मितिमा नै संविधान जारी गर्ने बताउनुभयो ।

अखिल नेपाल महिला सङ्घका अध्यक्षसमेत रहनुभएकी भण्डारीले भन्नुभयो–“सहमति हुन नसकेको विषयमा अन्तरिम संविधान, ऐन र कानुनका आधारमा प्रक्रियालाई अगाडि बढाएर संविधान जारी गर्नुपर्छ, जनताको जनमतको सम्मान गर्नुपर्छ ।”

उहाँले एनेकपा माओवादी सहित मधेसी दलका सभासद्हरुले सोमबार राति राष्ट्रिय सम्पत्तिमाथि हानिनोक्सानी हुने तथा मुलुकका शीर्षनेता तथा सभामुखमाथिको आक्रमणप्रति निन्दा गर्नुभयो ।

“सहमतिबाटै संविधान जारी गर्नुपर्छ भनेर सक्दो प्रयास गरिराख्नुभएका सभामुख सुवास नेम्वाङलाई जुत्ताले हान्ने, माइकले हान्ने काम अशोभनीय, अराजनीतिक र लज्जास्पद छ”–नेत्री भण्डारीले भन्नुभयो ।

नेपाल महिला सङ्घका अध्यक्ष डा डीना सङ्ग्रौलाले एमाओवादी र मधेसी मोर्चाका दलले लोकतन्त्रलाई कमजोर बनाउने काम गरी शीर्षनेता तथा सभामुखमाथि प्रहार गरेको प्रति भत्सर्ना गर्नुभयो ।

उहाँले संविधानसभाबाट संविधान आउने जनताको सपनालाई असफल पार्ने काम संविधानसभाकै एक ठूलो पार्टीका सभासद्बाट हुनुले राजनीतिक मूल्य, मान्यता, मर्यादा र अनुशासनको सबै सीमा नाघेकोसमेत आरोप लगाउनुभयो ।

महिला सङ्घर्ष समितिले समयमै संविधान जारी गर्न दबाबस्वरुप विभिन्न आन्दोलनका कार्यक्रम गर्ने तयारी गरेको छ ।