लुम्बिनी र बुद्धको प्रचार गर्दै म्यान्मारमा फोटो प्रदर्शनी

बुटवल, ७ माघ । बुद्ध जन्मेको देश नेपाललाई विश्वमा चिनाउन रुपन्देहीका एक पत्रकार अभियानको रुपमा लाग्नुभएको छ ।

सिद्धार्थनगर नगरपालिकाका ९भैरहवा० का सञ्चारकर्मी ५० वर्षीय चेतन पन्त लामो समयदेखि बुद्ध जन्मस्थल लुम्बिनी र बुद्ध जीवनीमा आधारित स्थलको अन्तर्राष्ट्रिय रुपमा प्रचार–प्रसार गर्न एक अभियन्ताका रुपमा हिँडिरहनुभएको छ ।

पन्तले हाल आफ्नो अभियानअन्तर्गत म्यान्मारको राजधानी याङ्गुनमा बृहत् फोटो प्रदर्शनी सुरु गर्नुभएको छ । म्यान्मारको सबैभन्दा ठूलो गोल्डेन चैत्य स्वेडगोन प्यागोडामा फोटो प्रदर्शनी सुरु गरिएको पत्रकार पन्तले जानकारी दिनुभयो ।

उहाँले बुद्ध नेपालमा जन्मेका हुन भनेर नेपाल, लुम्बिनी र बुद्धलाई चिनाउन फोटो प्रदर्शनीमार्फत सुरु गरेको बताउनुभयो ।

स्वेडगोन प्यागोडामा दैनिक १० हजार आन्तरिक र बाह्य पर्यटक पुग्ने हुँदा करिब एक लाख जनाले फोटो प्रदर्शनीमार्फत भगवान् बुद्ध, लुम्बिनी र नेपालका बारेमा जानकारी लिने अपेक्षा गरिएको छ ।

एघार दिनसम्म चलेको फोटो प्रदर्शनीका आयोजकमा म्यान्मारस्थित नेपाली दूतावास, नेपाल म्यान्मार फ्रेन्डसिप काउन्सिल र एनआरएन म्यान्मार रहेका छन् ।

म्यान्मारका बुद्धिस्टहरु लुम्बिनी भ्रमणमा आउने पर्यटकमध्ये चौथो स्थानमा रहेका छन् । लुम्बिनी भ्रमणमा आउनेमा सबैभन्दा बढी श्रीलङ्कन, त्यसपछि थाई तथा चीन र चौथोमा म्यान्मारका रहेका छन् ।

पत्रकार पन्तले यसअघि भारतको दिल्ली, बैंककमा दुई पटक, मलेसिया, सिङ्गापुर, अमेरिकालगायतका देशमा फोटो प्रदर्शनी आयोजना गरिसक्नुभएको छ ।