बन्दकर्ताले परीक्षा बिथोले

बुटवल, ६ माघ । एकीकृत नेकपा माओवादी, मधेसी मोर्चासहितको ३० दलीय मोर्चा र नेकपा–माओवादीका साथै आदिवासी जनजाति राष्ट्रिय आन्दोलनले आज आह्वान गरेको बन्दका अवस्थामा बन्दकर्ताले बुटवलस्थित कान्ति उच्च माविमा सञ्चालन भइहेको परीक्षा बिथोलेका छन् ।
बन्दका कारण यहाँ साना ठूला सबै सवारीसाधन ठप्प तथा शैक्षिक संस्था, उद्योगधन्दा, कलकारखाना, व्यापार व्यवसाय आदि बन्द छन् । पूर्वपश्चिम राजमार्ग र उत्तरदक्षिण सिद्धार्थ राजमार्गका चोक चोकमा बन्दकर्ता सडक अवरोध गरिबसेका छन् । अहिलेसम्म कुनै प्रकारको अप्रिय घटना भने नभएको प्रहरीले जनाएको छ ।

आज बिहानैदेखि भैरहवा, बुटवललगायत सहरमा बन्दकर्ताले नारा जुलुस गर्दै बन्दलाई समर्थन गर्न आग्रह गर्दै हिँडेका छन् ।

यसैबीच उद्योग वाणिज्य सङ्घ बुटवलले विज्ञप्ति प्रकाशन गरी बन्दहड्ताल नगर्न आग्रह गरेको छ । बन्दहड्तालले मुलुकको समग्र विकास र राष्ट्रिय अर्थतन्त्रमा नराम्रो प्रभाव पार्ने उल्लेख गर्दै दिगो शान्ति र समृद्धितर्फ लाग्न सबैमा अनुरोधसमेत गरिएको छ ।